Mártebeni aıqyndaıtyn Ádep kodeksi

Keshe Ortalyq kommýnıkasııalar qyzmetinde Memlekettik qyzmet isteri vıse-mınıstri Aıgúl Shaıymova men Memlekettik qyzmet salasyn baqylaý basqarmasynyń basshysy Maqsat Mýsınniń qatysýymen baspasóz máslıhaty ótti. Onda jańa Ádep kodeksiniń memlekettik qyzmetkerler aldyna qoıylatyn talaptary aıtylyp, sala mamandarynyń qoǵamdaǵy róli, olardyń etıkasy men estetıkasy sóz boldy. Aıgúl Shaıymovanyń aıtýynsha, memlekettik qyzmetshiler tártibiniń standarttary ekige bólip qarastyrylǵan. Olar bazalyq jáne ahýaldyq bolyp atalady. Munyń bazalyq júıesi memlekettik qyzmetkerlerdiń moraldyq-etıkalyq keıpine qoıylatyn negizgi talaptardy qalyptastyrýǵa jáne olardyń tártip vektoryn anyqtaýǵa baǵyttalǵan. – Jańa Ádep kodeksinde qabyldanǵan sheshimderdiń zańdylyǵy, ádildik pen ashyqtyqtyǵyn qamtamasyz etý, qyz­mettik mindetterdi tıimdi oryndaý jáne kásibı deńgeıin arttyrý, jeke máselelerdi sheshý turǵysynda qyzmettik laýazymyn paıdalanýǵa tyıym salý, iskerlik ádep pen resmı is-qımyl erejelerin saqtaý sekildi jaıttar tolyq qamtylǵan. Sondyqtan da atalǵan kodeks memlekettik qyzmetkerlerge únemi kórsetiletin memlekettik qyzmetterdiń sapasyn arttyrýǵa naqty talap qoıady, – dedi vıse-mınıstr. Sonymen qatar, ol elimizdegi memlekettik qyzmetter sapasyna 80 paıyz qazaqstandyqtardyń kóńili tolatynyn jetkizdi. – Bul júrgizilgen saýaldama nátıjesi. Jalpy, Ádep ko­deksinde qyzmetkerlerdiń júris-turysy, mádenıeti, sondaı-aq, qyzmettik mindetterdi oryndaý talaptary kórsetilgen, – dedi ol. Baspasóz máslıhatynda memlekettik qyzmetshilerdiń qoǵamdyq oryndarda ózin ózi ustaýy, ishimdik ishpeýi, balaǵat sózder aıtpaýy, eger osyndaı olqylyqtarǵa oryn bergen jaǵdaıda olardyń is-áreketi tártiptik keńeste qaralatyny aıtyldy. Jıyn sońynda Maqsat Mýsın jyl saıyn usynylatyn memlekettik qyzmetter sapasy jaqsaryp kele jatqanyn tilge tıek etti. Talǵat RAIYMBEK, «Egemen Qazaqstan»