Qazaqstannyń BUU Qaýipsizdik Keńesiniń 2017-2018 jyldardaǵy turaqty emes músheligine saılanýyna baılanysty Qazaqstan Respýblıkasynyń Prezıdenti N.Á.Nazarbaevtyń Úndeýi

Qazaqstan Respýblıkasy Azııa toby memleket­teri­niń atynan Birikken Ulttar Uıymy Qaýip­sizdik Keńesiniń 2017-2018 jyldarǵa ýaqytsha múshesi bolyp saılan­dy. Bul týraly 2016 jylǵy 28 maýsymda Nıý-Iorkte BUU Bas Assam­bleıasynda ótken daýys berýdiń nátı­jesinde málim boldy Qymbatty otandastar! Qazaqstan Táýelsizdiginiń 25 jyldyǵy belesinde taǵy bir mańyzdy tarıhı oqıǵa boldy. Elimiz Birikken Ulttar Uıymy Qaýipsizdik Keńesiniń 2017-2018 jyldardaǵy turaqty emes músheleri quramyna endi. Bul Keńes – Birikken Ulttar Uıymynyń Jarǵysymen «halyq­aralyq beıbitshilik pen qaýip­sizdiktiń basty jaýapkershiligi» júktelgen, turaqty jumys jasaıtyn organ. Elimizdiń oǵan saılanýy – Qa­zaq­stannyń halyqaralyq arena­daǵy bedeli men eńbeginiń moıyndalýy degen sóz. Bizdiń elimiz beıbitshilikti, qaýipsizdikti jáne ornyqty damýdy jaqtaıtynyn táýelsizdik jyldarynyń bárinde óziniń naqty isterimen dáleldep keledi. Ony barshańyz bilesizder. Semeı ıadrolyq polıgonyn jabý jáne qýaty jóninen tórtinshi zymyrandyq-ıadrolyq arsenaldan bas tartý týraly sheshimimizdi búkil Jer shary biledi jáne qoldaıdy. Bizge álemdik qoǵamdastyqtyń mundaı senim kórsetýi mem­le­ketimizdiń qarqyndy damýyna jáne bereke-birligimizge de baılanysty. Bul tek bizdiń elimizdiń ǵana emes, sondaı-aq, buǵan deıin esh­qa­shan halyqaralyq beıbitshilik pen qaýipsizdikke jaýap beretin organ­da ókilettilik etpegen búkil Orta­lyq Azııa sýbóńiriniń de tabysy. Qazaqstan aldaǵy eki jylǵa BUU Qaýipsizdik Keńesiniń múshe­ligine saılandy. Bul halyqaralyq qatynas­tar­daǵy kúrdeli kezeń bolmaq. Ony búgingi kún ahýalyna qarap-aq kórýge bolady. Dúnıe sozylmaly janjaldarmen qatar, qaýipsizdikke qaterdiń buryn-sońdy bolyp kórmegen keń aýqymymen betpe-bet kelip otyr. Biz jahandyq problemalardy sheshýdiń joldaryn izdestirýge súbeli úles qosatyn bolamyz. Turaqty jáne qaýipsiz álem – bul azamattarymyz ben balalarymyz úshin asa qajetti qundylyq. Naq sondyqtan Qazaqstan bolashaq qazirgiden de senimdirek jáne ıgiliktirek bolýy úshin ózine berilgen múmkindikti paıdalanyp qalýǵa umtylatyn bolady. Biz jahandyq qoǵamdastyqtyń nazaryn buǵan deıingi kókeıkesti bastamalarymyzǵa aýdarý nıe­tin­demiz. Olar ıadrolyq qarý men soǵys vırýstary jáne janjaldardan azat álem qurýǵa baǵyttalǵan. Qazaqstan osy izgilikti maq­sat­taryna BUU-nyń qu­ryl­ǵanyna 100 jyl tolatyn 2045 jylǵa qaraı qol jetkizý úshin jumys isteıtin bolady. Biz meniń BUU-nyń 2015 jyly ótken Bas Assambleıasynyń 70-shi sessııasynda jarııalaǵan terrorızmge qarsy bastamamdy ilgeriletýmen aınalysamyz. Qazaqstan, sondaı-aq, sý, energetıkalyq jáne azyq-túlik qaýipsizdigi máselelerin sheshýge serpin beretin bolady. Osynyń barlyǵy árkimge de qatysy bar tolǵaqty máseleler. Qazirgi zamanǵy shetin problemalardy sheshýge qatysý bizdiń aldymyzdan kóptegen eldermen jáne óńirlermen qarym-qatynastarymyzdy damytý úshin múmkindikter ashady. BUU Qaýipsizdik Keńesine saılaný – búkil Qazaqstan halqynyń eńbek sińirgen tabysy. Bul – ult tolysqandyǵynyń kórsetkishi. Biz beıbitshilik pen ynty­maq­tastyqtyń ortaq qundylyq­taryn ilgeriletýge qabiletti jaý­ap­kershilikti memleket retinde ózderiniń daýystaryn Qazaq­stannyń kandıdatýrasyna bergen barlyq elge rızashylyǵymyzdy bildiremiz. Bizdiń respýblıkamyz BUU Qaýipsizdik Keńesindegi ókilet­tigin qamtamasyz etý jónindegi qurmetti mıssııasyn laıyqty oryndaıtynyna senimdimin. Bul Qazaqstannyń álemdegi asa damyǵan memleketter qataryna ený, qaýipsiz jáne ósip-órkendegen bolashaq qurý jolyndaǵy taǵy bir tarıhı qadamy bolmaq. Men barlyq qazaqstandyqtardy elimiz Táýelsizdiginiń 25 jyldyǵy belesindegi osy mańyzdy oqı­ǵamen qut­tyq­taǵym keledi. Bul – elimiz úshin qýanýǵa bolatyn laıyqty oqıǵa. Elimiz osynaý zor senimniń úde­sinen shyǵyp, Qazaqstannyń álem­dik arenadaǵy abyroıy asqaq­taı túserine kámil senemin! Bar­shańyzdy osy tabysymyzben quttyq­taımyn!