Qazaqstannyń jańa bıigi

Keshe elordadaǵy Ulttyq akademııalyq kitaphanada Qazaqstan halqy Assambleıasynyń depýtattyq korpýsy alqasynyń otyrysy ótti. Is-sharaǵa Qazaqstan halqy Assambleıasy Tóraǵasynyń orynbasary – Hatshylyq meńgerýshisi Eraly Toǵjanov, Parlament Májilisiniń depýtattary, Assambleıa músheleri, qoǵam qaıratkerleri, memlekettik organdardyń ókilderi qatysty. Elimizdiń BUU Qaýipsizdik Keńesiniń turaqty emes músheligine saılanýy Qazaqstan halqy Assambleıasy depý­tattyq korpýsy alqasyndaǵy áńgimeniń altyn arqaýyna aınaldy. Jıyndy ashqan E.Toǵjanov qazaqstandyqtardy Qazaqstan halqy Assambleıasy atynan tarıhı oqıǵa – Qazaqstannyń Birikken Ulttar Uıymynyń basty organy – Qaýipsizdik Keńesiniń turaqty emes músheligine saılanýymen quttyqtady. Bul – tarıhı, úlken jeńis. Bizdiń elimiz – Ortalyq Azııada BUU-nyń Qaýip­sizdik Keńesiniń quramyna saılan­ǵan tuńǵysh memleket. 2016 jylǵy 28 maýsymda Nıý-Iorkte BUU Bas As­sambleıasy jumysyna 193 memlekettiń qatysýymen ótken daýys berý kezinde Qazaqstanǵa 138 memleket qoldaý kórsetti. 2017 jyldyń 1 qańtarynan bastap 2018 jyldyń 31 jeltoqsanyna deıin Qazaqstan Respýblıkasy Azııa-Tynyq muhıt aımaǵy memleketteri atynan BUU saıası organynyń asa mańyzdy jumysyna resmı túrde qatysatyn bolady, oǵan Uıymnyń Jarǵysymen jahan­dyq beıbitshilik pen qaýipsizdikti saqtaý boıynsha ókilettikter júkte­ledi. Bul – Qazaqstannyń Tuńǵysh Prezı­denti, Elbasy Nursultan Ábishuly Nazarbaev­tyń beıbitshilik súıgish syndarly syrtqy saıasatynyń saltanatty jeńisi. Bul – barsha qazaqstandyqtardyń jeńisi, dedi ol. Sondaı-aq, Eraly Luqpanuly eli­miz­diń BUU Qaýipsizdik Keńesine múshe bolyp saılanýy – Qazaqstannyń halyq­­aralyq joǵary bedeliniń aıshyq­ty aıǵaǵy ekenin, sol sebepti onyń halyq­aralyq qaýipsizdikti jáne mem­leketaralyq qatynastardaǵy senim sharalaryn nyǵaıtýǵa qosqan úlesiniń baǵalanýy bolyp sanalatynyn atap ótti. Qarýsyzdaný saıasatynyń etalony bolǵan Qazaqstannyń jáne onyń Kóshbasshysynyń Semeı ıadrolyq polıgonyn jabý, ıadrolyq qarýdan óz erkimen bas tartý bastamashyl, beıbitshil ıdeıalary halyqaralyq qoǵamdastyqta qoldaýǵa ıe boldy. Qazaqstannyń Azııadaǵy ózara is-qımyl jáne senim sharalary jónindegi keńes shaqyrý týraly bas­tamasy, Eýropadaǵy qaýipsizdik jáne yntymaqtastyq uıymyna tóraǵalyq etýi, Ortalyq Azııada ıadrolyq qarýdan azat aımaq qurý, qaýipsiz jańa álem men ádilettilikke baǵyttalǵan G-global bastamasy Qazaqstandy beıbitshil bastamalar men búkil álemdegi senim atmosferasyn qalyptastyrýshy kóshbasshy retinde tanytty. Halyqaralyq qoǵamdastyqty ıadrosyz álem qurýǵa, kez kelgen soǵys túrin boldyrmaı, onyń aldyn alýǵa shaqyrǵan AQSh-taǵy ıadrolyq qaýipsizdik jónindegi sammıtte jarııalanǵan Qazaqstan Respýblıkasy Prezıdentiniń «Álem. XXI ǵasyr» manıfesi BUU-nyń resmı qujatyna aınaldy. Bul jeńis – Ortalyq Azııanyń jáne elimizdiń ár azamatynyń qaýipsizdigin nyǵaıtýdyń kepili, dedi ol óziniń sózinde. Budan keıin sóz alǵan qoǵam qaıratkeri Myrzataı Joldasbekov: «Bizdiń qýanyshymyz qoınymyzǵa syımaı otyr. Biz keshe qandaı memleket edik? Taǵdyrymyzdy Keńes Odaǵyndaǵy jaýapty adamdar sheshetin. Endi Táýelsizdik aldyq. Oǵan 25 jyl toldy. Qazir biz álemniń tórine shyqtyq. Jaqynda BUU-nyń sammıti ótti. Osynyń bári, túptep kelgende, Nursultan Ábishuly degen azamattyń eńbeginiń arqasy men bedeli. 193 memlekettiń ishinen 138-i daýys beripti. Qazir, mine, Qaýipsizdik Keńesine múshe bolyp otyrmyz», – dedi. Májilis Tóraǵasynyń orynbasary V.K.Bojko óz sózinde elimizdiń álemdegi eń bedeldi uıymnyń bıigine kóterilýi Qazaq eliniń jańa bıigi bolyp tabylatynyn atap aıtyp, Qazaqstannyń osynaý jarqyn jeńisinde memlekettegi etnosaralyq tatýlyqtyń, qoǵamdyq kelisimniń úlken orny bar ekenin, al munyń negizgi tetigi Elbasynyń bastamasymen qurylǵan, Prezıdent Nursultan Nazarbaev basqaratyn Qazaqstan halqy Assambleıasynyń alar orny úlken ekenin atap ótti. Al qoǵam qaıratkeri Ádil Ahme­tov óziniń sózinde bylaı dedi: «Nege Qazaqstandy tańdady degende, Qazaq­standa ıdeıa bar, ıdeıany júzege asyratyn mehanızm bar. Mehanızmi – Qazaqstan halqy Assambleıasy. Kóp jaǵdaıda Qazaqstan halqy Assambleıasy – eldiń yntymaǵyn, birligin saqtap otyrǵan úlken ınstıtýt. Ol halyqaralyq dárejege ıe boldy. Muny dıplomatııanyń jemisi dep jatyrmyz, árıne, Qazaqstannyń dıplomatııasy úshin bul – úlken tabys. Mynandaı alaı-dúleı zamanda beıbitshilikti uran etip, tý etip kótergen Qa­zaqstannyń Qaýipsizdik Keńesiniń tu­raqty emes músheligine ótýi – úlken jeńis. Depýtattyq korpýs alqasynyń otyrysy aıasynda Májilis depýtaty, alqa tóraǵasynyń orynbasary Saýytbek Abdrahmanov ta el ómirindegi orasan mándi oqıǵa týraly pikirin bildirdi. «Búgingi kún – memleket tarıhyna enetin kúnderdiń biri. Bárimizdiń abyroıymyzdy asyrǵan, mereıimizdi tasytqan kún, – dedi S.Abdrahmanov. – Álem taǵdyryn sheshetin asa bedeldi uıymnyń – Birikken Ulttar Uıymynyń eń basty býynyna, ıaǵnı BUU Qaýipsizdik Keńesiniń tu­raqty emes músheligine saılaný arqyly Qazaqstan óz Táýelsizdiginiń shırek ǵasyrlyq belesine tamasha tabyspen jetip otyr. Azııa qurlyǵynyń osy óńirine bólingen bir orynǵa biz Taıland memleketimen talasqanymyzǵa aıryqsha nazar aýdarý kerek. Kezinde jýrnalıstik saparmen Taılandta bolǵanmyn, el týraly «Álemge áıgili» avtorlyq aıdaryna jazǵanmyn da. Taıland – óz tarıhynda eshqashan táýeldilikke túsip kórmegen álemdegi sırek elderdiń biri. Munyń ózi ol memlekettiń syrtqy saıasatynda myqty dástúrler baıaǵyda-aq qalyptasqanyn kórsetedi. Onyń ústine Taılandtyń týrıstik tartymdylyǵy, eldiń ózindik brendiniń beriktigi de ony bizge bedeldi qarsylas etkendigi sózsiz. Biraq, túptep kelgende, Qazaqstannyń álemdegi ıadrolyq qarýsyzdaný úderisine qosqan sheshýshi úlesi, beıbitshilikti ornyqtyrý baǵytyndaǵy baǵaly bas­tamalary, saıa­sı turaqtylyǵy men ekonomıkalyq ornyqtylyǵy, etnosaralyq tatýlyqty saqtaýdaǵy úzdik úlgisi tarazy basyn basyp ketti. Osynyń bárine biz eń aldymen Elbasymyzdyń dana dıplomatııasynyń, sara saıasatkerliginiń, dara qaırat­ker­liginiń arqasynda qol jetkizip otyrmyz. Aldaǵy kezde de osy abyroı bıiginen tabyla berýge tıispiz. Endigi jerde Qazaqstanǵa álem nazary burynǵydan da kóbirek túsetinin dáıim este ustaýymyz shart. Munyń ózi bizdi qaı turǵydan da shırata beretin bolady. Qol jetken­ge toqmeıilsýdiń jóni joqtyǵyn, shıry­ǵatyn, shıraıtyn tustarymyz jetkilikti ekenin ómirdiń ózi kórsetip otyr», – dedi depýtat. Budan keıin otyrysqa qatysýshylar Qazaqstanda úsh tilde bilim berýdi en­gizý boıynsha aqparattyq-túsindirý ju­mystaryn uıymdastyrý boıynsha QHA depýtattyq korpýsy alqasynyń usynymdaryn júzege asyrýdy, sondaı-aq, densaýlyq saqtaý jáne áleýmettik damý salasynda «100 qadam: barshaǵa arnalǵan qazirgi zamanǵy memleket» Ult Josparyn iske asyrý máselelerin talqylady. Máselen, Bilim jáne ǵylym vıse-mınıstri Elmıra Sýhanberdıeva atalǵan vedomstvo bıylǵy jyldyń 27 mamyry men 27 maýsymy aralyǵynda kóptegen is-shara júzege asyrylǵanyn atap ótti. «Mınıstrlik Máńgilik El» ıdeıa­syn júzege asyrý, túsindirý, nasıhattaý baǵytynda Qazaqstan halqy Assambleıasy janyndaǵy «Qoǵamdyq kelisim» res­pýb­lıkalyq memlekettik mekemesi ázirlegen ádisnamalyq aqparattardy barlyq óńirge jiberdi. Qazirgi tańda «Máńgilik El» Patrıottyq aktisin túsindirýdi pedagogıkalyq mamandardyń biliktiligin arttyrý baǵytyndaǵy barlyq oqý jos­paryna engizý jolǵa qoıyldy», – dedi E.Sýhanberdıeva. Bul kúni, sonymen qatar, elimizdegi densaýlyq saqtaý jáne áleýmettik damý salalarynda júzege asyrylyp jatqan jumystar jaıy sóz boldy. Láıla EDILQYZY, «Egemen Qazaqstan»