Elbasy Túrkııa prezıdentine kóńil aıtty

Qazaqstan Prezıdenti Nursultan Nazarbaev Túrkııa Prezıdenti Redjep Taııp Erdoǵanǵa qarýly tóńkeris jasaý áreketine baılanysty kóńil aıtý jedelhatyn joldady. akorda.kz-tiń habarlaýynsha, jedelhatta Elbasynyń jekelegen teris pıǵyldy kúshterdiń Túrkııada qarýly tóńkeris jasaý áreketi týraly habardy úlken alańdaýshylyqpen qabyldaǵany atap ótilgen. «Qaıǵyly oqıǵa saldarynan barlyq qaza bolǵandar men zardap shekkender otbasylarynyń qaıǵysyna ortaqtasa otyryp, kóńil aıtamyz. Baýyrlas túrik halqyn birlestikke jáne bolǵan oqıǵaǵa qatysty tózimdilik tanytýǵa shaqyramyz. Jaǵdaıdyń tezirek retke keletinine senimdimiz. Túrik halqy memlekettiń demokratııalyq jolmen saılanǵan qazirgi basshylyǵymen birge barlyq syn-qaterlerge tótep berip, demokratııa jáne órkendeý jolyndaǵy turaqty damýyn jalǵastyratynyna esh kúmán keltirmeımiz», – delingen jedelhatta. Nursultan Nazarbaev barsha Qazaqstan halqynyń jáne jeke óziniń atynan Redjep Erdoǵanǵa tilektestigin bildirip, dostas elderdiń jarqyn bolashaǵyna senimdiligin jetkizdi. Aıan ÁBDÝÁLI