Jıyn-terimge daıyndyq oıdaǵydaı

Elimizdiń ońtústik óńirlerinde egin oraǵy bastalyp ketkeni málim. Al astyqty ólke – soltústiktegi oraq naýqanyna daıyndyq jumystary qaıta-qaıta pysyqtalyp jatyr eken. Keshe Ortalyq kommýnıkasııalar qyzmetinde baspasóz máslıhatyn ótkizgen «QazAgro» ulttyq basqarýshy holdıngi» AQ-tyń basqarma tóraǵasy Nurlybek Malelov kúzgi naýqanǵa daıyndyq jóninde áńgimeledi. Basqarma tóraǵasy bıylǵy tuqym sebý naýqany óte jaqsy ótkeni jóninde aıtyp, aldaǵy jıyn-teraim jumystaryna jasalyp jatqan daıyndyqtarǵa toq­taldy. Eń bastysy, bıyl egin orý naýqanyn qarjylandyrý úshin «QazAgro» 60 mlrd. teńge bólipti. Bıyl bul qarjy aýylsharýashylyq taýar óndirýshilerine 5 paıyz, bank­terge 7,41 paıyzben taratylypty. Osyny aıtqan spıker kelesi jyldan bastap paıyzdyq qaıtarym kólemi budan da azaıtylatynyn jetkizdi. «Bıyl 60 mlrd. teńge berildi. Olar túrli baǵyttarda bólindi. Birinshi baǵyt – qarjyny ekinshi deńgeıli bank­ter kooperatıvterge beredi. Ekin­shi, qarjyny ózimizdiń enshiles me­kemeler arqyly berdik. Qazir­gi ústeme – aýylsharýashylyq ta­ýar óndirýshiler úshin – 5 paıyz, bankterge – 7,41 paıyz. Alaı­da, Aýyl sharýashylyǵy mı­nıstr­­ligimen birge kelesi jylǵa baǵa qalyptastyrý máselesin de qarastyrdyq. Buıyrtsa, kelesi jyly paıyzdar aıtarlyqtaı tó­mendetiledi», dedi N.Malelov. Aǵymdaǵy jyly 2 514 aýyl­sharýashylyq taýar óndirý­shi­leri 58,4 mlrd. teńge nesıe alypty. «Jyl basynan osy kúnge deıin bıýdjettik nesıe aıa­synda 58,4 mlrd. teńgege 2 514 aýylsharýashylyq taýar óndirýshileri qarjylandyryldy. Jalpy, egistik alqaptary 5 mln. gektar aýmaqty quraıdy. Sonyń ishinde, astyqty kepildikpen forvardtyq satyp alýǵa 14,1 mlrd. teńgege 1718 AShTО́ qar­­jy­landyryldy. Egistik ala­ńynyń kólemi 2,3 mln. ga. Al ekinshi deńgeıli bankterdiń ke­pildigimen tikeleı nesıeleýge shamamen 2 mln. gektar alańǵa egin egý úshin 36 mlrd. teńgege 584 AShTО́-ge nesıe berildi», degen basqarma tóraǵasy, holdıngtiń quramyndaǵy sharýalarǵa nesıe beretin ortalyqtardyń ju­my­syna toqtaldy. «QazAgro» ulttyq basqarýshy holdıngi» AQ quramyndaǵy úsh kompanııa qarjy bólýmen aınalysady. Ol – «QazAgroQarjy», «Agrarlyq ne­sıelik korporasııa» jáne «Aýyl sharýashylyǵyn qarjylaı qol­daý qory» AQ-tar. Osy úsh uıym oblys ortalyqtarynda fılıal­daryn ashqan. Olar nesıelik se­riktestikter arqyly sharýalarǵa nesıe beredi», dedi ol. Otandyq sharýalar bıyl 8 mlrd. teńgege 461 tehnıka satyp alypty. «Osy jyldyń 7 aıynda sharýalarǵa tehnıka satyp alýdy qarjylandyrý sheńberinde 8,3 mlrd. teńge somasyna 461 birlik tehnıka alyndy. Munymen birge, sharýalar aldaǵy egis naýqanyn aıaqtaý úshin taǵy da jańa tehnıkalar satyp alýdy jos­parlap otyr. Osyǵan oraı, qajetti aýylsharýashylyq tehnıkasyn satyp alý úshin 15,2 mlrd. teńgege 954 qarjy lızıngi sharty jasaldy. Bul baǵytta 594 traktor, 131 dán­sepkish pen basqa da tehnıkalar jetkizilmek», dedi N.Malelov. Brıfıng barysynda elimizde kooperatıv qurý tájirıbesi aýyl sharýashylyǵynyń basqa da salalaryna engiziletini aıtyldy. «QazAgro» kooperatıvter júrgizgen jumystar oń nátıje bergenin esepke ala otyryp, ony aýyl shar­ýashylyǵynyń basqa da salalaryna engizýdi josparlapty. Endi 2018 jylǵa deıin sút óńdeý jáne óndirý, et ónimderin, maqta, shubat, júgeri óndirý, omartashylyq, qoı ósirý jáne dándi daqyldar egýdi qarjylaı qoldaý qorynyń kómegimen kooperatıv negizinde júzege asyrýdy oılastyryp jatyrmyz», dedi basqarma tóraǵasy. Kooperatıvtiń artyqshylyq­tary jóninde uzaq áńgimelegen spıker, aýylsharýashylyq koo­pe­ratıvi jumysynyń tabysty bolýy sharýalardyń aýyzbirligi men jumysyna baılanysty ekenin qadap aıtty. Sóıtsek, osy jyldyń basynan bastap «QazAgro» Aqmola, Soltústik Qazaqstan, Qaraǵandy jáne Pavlodar oblystarynda 10 kooperatıvti qarjylandyrypty. Nátıjesinde, 726 myń gektar jerge egin ekken 212 sharýaǵa 8,3 mlrd. teńge kóleminde qarjylaı qoldaý kórsetilgen. Nurbaı ELMURATOV, «Egemen Qazaqstan»