Baǵany baqylaýda ustaý úshin

Astana ákimdigi azyq-túlik baǵalarynyń ósýine jol bermeý boıynsha sharalar qoldanady Keshe qala ákimi Áset Isekeshevtiń tóraǵalyǵymen azyq-túlik baǵasyn turaqtandyrý máselelerin talqylaý boıynsha keńes ótti. Oǵan qalalyq ókiletti organdardyń, statıstıka departamentiniń, UEM tabıǵı monopolııalar jáne básekelestikti qorǵaý komıtetiniń, «Qazagromarketıng» AQ ókilderi, sondaı-aq, elordanyń iri kásiporyndarynyń basshylary qatysty. Keńes barysynda Memleket basshysynyń elordada azyq-túlik ónimderiniń qaýipsizdigin qamtamasyz etý jónindegi tapsyrmasyn oryndaýǵa baǵyttalǵan sharalar talqylandy. Elorda ákimi áleýmettik-mańyzdy taýarlardyń, sonyń ishinde nan, jarma jáne qanttyń baǵasyn ustap qalýǵa baǵyttalǵan birqatar naqty tapsyrmalar berdi. Kún saıyn aýyl sharýashylyǵy ónimderiniń jármeńkesin ótkizý jáne saýda oryndarynyń sanyn keńeıtý, avtodúkender ashý týraly sheshim qabyldandy. Osyǵan baılanysty Qazaqstannyń óńirlerimen aýyl sharýashylyq ónimderin tikeleı elordaǵa jetkizý týraly kelisimge qol jetkizildi. Osy maqsatta qala basshysy azyq-túlik tasymaldaýshy kólikterge «jasyl dálizdi» qamtamasyz etýge tapsyrma berdi. Sonymen qatar, jármeńkede satylatyn ónimder assortımenti de keńeıtilmek, endi maı, shaı, jarmalar jáne basqa azyq-túlik taýarlary satylady. Et jáne sút ónimderin tekserýge arnalǵan mobıldi zerthanalar ornatylady. Osyǵan baılanysty aıta ketetin másele, qalalyq ákim­diktiń ókilderi jármeńkelerde ónim­der baǵasyna udaıy baqylaý júrgizedi. Ulttyq ekonomıka mınıstrliginiń Tabıǵı monopolııalar jáne básekelestikti qorǵaý komıteti baǵalarǵa tu­raqty túrde monıtorıng júr­gizetin bolady. Osy ózekti másele boıynsha qabyldanatyn sharalardy úılestirý úshin Astana qalasy ákiminiń orynbasary Andreı Lýkınniń jetekshiligimen jedel shtab quryldy. Elordada azyq-túlik qaýipsizdigin qamtamasyz etý máselesi qala basshysynyń jeke baqylaýyna alyndy.