Astanada nan men qant arzandaıdy

  Qazaqstan Prezıdenti ja­nyndaǵy Ortalyq kommýnıkasııalar qyzmetinde Astana qa­lasy ákiminiń orynbasary A.Lý­kınniń, Astana qalasy aýyl sha­rýashylyǵy basqarmasynyń basshysy Á.Qurmanǵalıevtiń, «Astyq Logıstık» JShS dırektory S.Belıkovtiń, «Sapa Nan» JShS dırektory V.Savınovtiń jáne «Mır krýp» JShS dırektory M.Saýdagerovtiń qatysýymen baspasóz máslıhaty ótti. Baspasóz máslıhatynda elorda ákimdiginiń iri un, qant jáne nan jetkizýshilermen kelisimge qol jetkizgeni, sonyń arqasynda qalada jaqyn kúnderi un men qanttyń, nannyń baǵasy arzandaıtyny aıtyldy. Atap aıtqanda, qant – 6 teńgege, nan 5 teńgege arzandamaq. – Saýda núkteleri úshin un qazirgiden 15 paıyz tómen baǵamen jetkiziledi, – dedi «Astyq Logıs­tık» JShS dırektory S.Belıkov. Búginde elorda ákimdigi tarapynan azyq-túlik baǵasyn retteý maqsatynda tıisti sharalar qabyldanyp jatqanyn atap ótken jón. Osy maqsatta jumysty jedel úılestirýmen shuǵyldanatyn shtab qurylyp, oǵan jetekshilik jasaý qala ákiminiń orynbasary A.Lýkınge júktelgen. A.Lýkınniń aıtýynsha, Astana ákimdigi áleýmettik mańyzy bar azyq-túlik túrleriniń baǵasyna kún saıyn monıtorıng júrgizedi. Sonymen qatar, azyq-túlik ón­­diretin kásiporyndarǵa, kók­ónis, jemis-jıdek saqtaý qoıma­larynyń, jylyjaılardyń ju­mysyna qoldaý kórsetilýde. Arnur ASQAROV, «Egemen Qazaqstan»