Medısınalyq poıyzdardyń kómegi kóp

  Keshe Ortalyq kommýnıkasııalar qyzmetinde «Densaýlyq», «Járdem» jáne «Salamatty Qazaqstan»  medısınalyq poıyzdary jobasynyń iske asyrylý barysy týraly» taqyrybynda baspasóz máslıhaty bolyp ótti. «Memleket basshysy Jol­daýynyń kólik medısınasyn damytý atty negizgi basymdyǵyn iske asyrý maqsatynda  joǵaryda atalǵan  medısınalyq poıyzdardy QR IIM Tótenshe jaǵdaılar komıtetiniń «Apattar medısınasy temir jol gospıtaldary» aksıonerlik qoǵamy, «Qazaqstan temir joly» UK» aksıonerlik qoǵamy jáne Qazaqstan Respýblıkasynyń Den­saýlyq saqtaý jáne áleýmettik damý mınıstrligi birlesip iske qosty. Mundaı áleýmettik jobany iske asyrýdaǵy basty maqsat, medısınalyq qyzmetterdiń osy túrlerin alýǵa múm­kindigi joq, shalǵaı eldi me­kenderdiń turǵyndary­na konsýltatıvtik-dıagnos­tı­­ka­lyq medı­sınalyq kó­­mek kórsetý bolyp tabylady. Medısınalyq poıyzdyń vagondarynda dárigerlerdiń kabınetteri, dıagnostıkalyq korpýs, tirkeý bólimi, tamaqtaný jáne demalý bloktary  or­nalasqan. Stomatolog, dermatolog, ýrolog, mammolog, gınekolog, nevropatolog, kardıolog, terapevt, otolarıngolog, pedıatr, okýlıst sııaqty mamandarǵa kezekke turǵandar kóp. Poıyzda ÝDZ-dıagnostıkalaý, tańý, emsharalyq kabınetter jáne shaǵyn hırýrgııalyq ota jasaıtyn operasııalyq blok qarastyrylǵan. Barlyq kabınetter tolyqtaı kompıýterlengen. Sandyq flıýrografııalyq apparat rentgen túsirilimin pasıenttiń jyldam alýyn qamtamasyz etedi, tap­syrylǵan taldamanyń nátıjesi de kóp kúttir­meıdi. Osy jyly medısı­nalyq po­ıyzdar elimiz Táýelsizdiginiń 25 jyldyǵyna arnalǵan respýblıkalyq aksııa aıasynda jumys isteıdi», – dedi IIM TJ komıtetiniń resmı ókili R. Imanqulov. «Dertine shıpa taýyp, densaýlyǵy jaqsarǵan jandar bizge kóptep hat jazyp, alǵystaryn aıtyp, aqjarma tilekterin joldap jatady. Munyń ózi eńbektiń janǵany emes pe», – dedi ol. Raýan QAIDAR, «Egemen Qazaqstan»