Búgin Astanadaǵy Boks ortalyǵynda Qazaqstan ulttyq qurama komandasy men Kolýmbııa, AQSh, Meksıka jáne Domınıkan Respýblıkasynyń boksshylarynyń arasynda sparrıng kezdesýler ótti.
Osy jekpe-jekter týraly elimizdiń ulttyq quramasynyń bas jattyqtyrýshysy Myrzaǵalı Aıtjanov egemen.kz saıtyna óz oılarymen bólisti. Bas jattyqtyrýshy komandanyń oqý-jattyǵý jıyny josparly túrde bolyp jatqanyn, endi Olımpıadaǵa daıyndyq Rıo-de-Janeıro qalasynda jalǵasatynyn aıtty.
-Oqý-jattyǵý jıyny jaqsy ótip jatyr. Bul bizdiń elimizdegi Olımpıada aldyndaǵy sońǵy daıyndyǵymyz. Qazir boksshylar jarysqa 70 paıyzǵa daıyn. Jigitter ózderine tıesili tapsyrmalardy oryndady. Osy jattyǵýlarda biz ózimizge tıisti jumystardy bastan-aıaq jasap shyqtyq, – dedi ol.
Sonymen birge ol ulttyq quramanyń daıyndyǵyna arnaıy shaqyrylǵan sheteldiń boksshylary týraly da aıtty. «Bizdiń quramamen oqý-jattyǵý jıynynda sparrıng kezdesýler ótkizý úshin sheteldiń 9 boksshysy shaqyrylǵan. Bul boksshylar orta deńgeıli sportshylar. Olar boksshylarǵa kómektesip jatyr. Sheteldikterdi Qanat Islam ákeldi. Qanattyń ózi kelesi jekpe-jegine AQSh-ta emes, Qazaqstanda daıyndalǵan jaqsy dep jatyr», dedi Myrzaǵalı Aıtjanov.
Dastan KENJALIN
Foto: Qazaqstan boks federasııasy
