Asyq atqan qarııalar

Kókshetaý qalalyq ardagerler keńesi ulttyq sport túrleri men salamatty ómir saltyn nasıhattaý maqsatynda «Asyq atý» jáne «Bes tas» I jalpyqalalyq jarysyn ótkizdi. Bul básekeniń ereksheligi men artyqshylyǵy – oǵan otyzdan astam aqsaqaldyń qatysýynda der edik. Jarysty uıymdastyrǵan «Qazaq tili jáne mádenıeti» oblys­tyq uıymynyń, «Mıras» keńesiniń jáne «Nur Otan» partııasy oblystyq fılıalynyń ókilderi atalar úlgisi ulttyq oıyndy osylaısha jańǵyrtýdy jón sanapty. – Biz qurmetti eńbek demalysynda júrse de atalarymyz ben ájelerimizdiń salamatty ómir saltyn nasıhattaýdaǵy, jastardyń boıyna ulttyq dástúrlerimizdiń tálimdik marjandaryn uıalatýdaǵy belsendi qyzmetine rızashylyq bildiremiz. Qazynaly qarttarymyz óz úlgisimen óskeleń urpaqty asyl oılar men bıik maqsattarǵa jeteleı beretindigi qýanyshty. Boılaryńyzdan qýat ketpeı, aqylshymyz bolyp júre beri­ńizder, – dedi jarystyń ashylý saltanatynda Kókshetaý qalasy ákiminiń orynbasary Altynaı Ámirenova. Ereje talaptaryna sáıkes  «Asyq atýǵa» qatysýshylar jar­qyraǵan súıekterdi sheńberden múmkindiginshe kóbirek shyǵarýy qajet. Júzderi shat qarııalardyń qolyndaǵy asyqtar urshyqsha ıirilip, aýyr soqqymen dóp tıip jatqanyna kórermen dúrkiretip shapalaq urýmen boldy. – Árıne, bala kezimizde barly­ǵymyz asyq oınadyq. Bul eń qyzyqty dáýren edi. Oqýdan qoly­myz bosasymen áshekeıli dorba­myzdaǵy qorǵasyn quıylǵan saqa­larmen jerdiń shańyn shyǵa­ratynbyz. Odan beri de qanshama ýaqyt ótti, búgingi jarys kórigin qyzdyrǵan shaldar balalyq shaqqa oralǵandaı kúı keshýi qandaı ǵanıbet, – deıdi bizben tildesken UQK bastaýysh ardagerler keńe­siniń tóraǵasy, otstavkadaǵy polkovnık Saılaýbaı Ybyraev. Osydan bolsa kerek, jarysqa qatysýshylardyń barlyǵy sheber oıyn kórsetip, jeńiske degen jiger tanytty. Árıne, balalyq shaqtyń «rekordtaryn» qaıtalamasa da  mergendigimen kózge túskenderge qyzyǵa qaraýshylar kóp boldy. Tartysty jarysta qalalyq ardagerler keńesiniń tóraǵasy Shıap Álıev birinshi, al Habıbolla Ǵazızov pen Jumaǵalı Jurymbaev júldeli oryndardy enshiledi. Ájeler arasyndaǵy «Bes tas» básekesiniń qyzyǵy bir tóbe edi. Munda Jibek Balabekova aldyna jan salmady. Qazylar alqasynyń sheshimimen Kúlmash Samaeva ekinshi, Kenjebaı Smaǵul úshinshi oryndy enshiledi. Jarysqa qatysýshylardyń barlyǵy kórermenderge qýa­nysh syılaýmen qatar, syı-syıa­pattarǵa ıe boldy. Jarysty uıym­­dastyrýshylar bul báse­keniń dástúrli sıpat alatynyn atap ótti. Baqbergen AMALBEK, «Egemen Qazaqstan» Kókshetaý