«Astana» óz alańynda «Seltıkpen» teń tústi

Keshe Astanadaǵy «Astana-Arena Qajymuqan» sport kesheninde «Astana» men Shotlandııanyń «Seltık» komandalary arasynda Eýropa chempıondar lıgasy úshinshi irikteý raýndynyń birinshi matchy ótip, oıyn 1:1 esebimen teń aıaqtaldy. Birden aıtyp qoıaıyq, kez­desýdiń óne-boıynda alań ıe­leriniń basymdylyqtary anyq baıqalyp turdy. Olar oıyn tizginin de aldymen qolǵa aldy, matchtyń esebin de birinshi bolyp ashty. Bizdiń jerlesterimiz ýaqyt uzaǵan saıyn qarsy qaqpa jaqqa jasaǵan qysymyn kúsheıte tústi. Sonyń aqyry 19-mınýtta oıyndaǵy birinshi golǵa alyp bardy. Áýeli sol joryqtar sátinde qonaqtar aıyp alańy ishinde Jýnıor Kabananga óte qolaıly jerden múlt ketti. Sol dopty glazgolyqtar qorǵaýshysy qaqpa syrtyna qaraı teýip jibergennen keıin buryshtama berildi. Ony oryndaǵan Patrık Tvýması dop­ty qaqpashy alańy ishinde turǵan Iýrıı Logvınenkoǵa dál jetkizdi. Ol dopty basymen qatty uryp, qaqpaǵa toǵytty. Astanalyqtarda budan keıin de esepti ulǵaıtýdyń birneshe múmkindigi boldy. Solardyń birinde aıyp alańy ishinde qaqpashymen betpe-bet kelgen Azat Nurǵalıevtiń urǵan dobyn golkıper Kreıg Gordon áreń qaıyryp, buryshtamaǵa asyryp úlgerdi. Munyń sońynan bizdiń jerlesterimiz taǵy birneshe ret buryshtama berý quqyǵyna ıe boldy. Biraq solardyń basym kópshiliginde Tvýması dopty dál aldyńǵydaı etip qaqpa alańyna qaraı jetkizip bere almaı, olar qonaqtar qorǵaýshylarynyń ońaı oljalaryna aınalyp ketip jatty. Ekinshi taımnyń bas jaǵynda astanalyqtar basym kóringenimen, qonaqtar birazdan keıin alańdaǵy jaǵdaıdy teńestirýge qol jet­kizdi. Sol mezetterde olar batyl shabýylǵa da shyǵa bastady. Osy qarsy shabýyldar 78-mınýtta meımandardy jaýap dop so­ǵýǵa jetkizdi. Buǵan bizdiń qaqpa alańynda tórt birdeı oıynshyny aldap ótken Patrık Roberts kóp eńbek sińirdi. Onyń alań ortasyna qaraı tastaǵan dobyn sol sátte Lı Grıffıts toqtatpastan qaqpaǵa qaraı tepti. О́ziniń sol búıiri jaǵynan zý ete qalǵan dopqa Nenad Erıch tosqaýyl qoıa almady.  Gol! Esep osylaı teńesti. Budan keıin «Astana» jaıdaq atqa qonyp, taǵy biraz qarsylastar alańyna qaraı jóńkile umtyldy. Sol mezetterde birneshe ret alǵa shyǵýdyń múmkindikteri boldy. Biraq bizdiń fýtbolshylar odan tıimdi nátıje shyǵara almady. Matchtyń sońǵy sekýndtarynda Marın Anıchıch dál sondaı keremet múmkindikti bosqa jiberip qoıdy. Endi komandalar bir aptadan keıin Shotlandııanyń astanasy – Glazgoda qarymta match ótkizedi. Onyń qorytyndysy boıynsha kelesi kezeńge ótetin komanda belgili bolady. «Astana» úshin bul kezdesýde keminde 2:2 esebimen teń oınaý ne qandaı da bir eseppen utý kerek. Damır QOJAMQUL Sýretti túsirgen Erlan OMAROV