Áýlettiń eńbek ótili – 440 jyl

Shańyraqta 27 nemere, 40 shóbere órkendep ósip keledi Jeńimpazdardy marapattaý rásiminde oblys ákiminiń orynbasary Jandos Ábishev bıylǵy jylǵy baıqaýda baq synaýǵa óńirdegi 255 otbasynyń nıet bildirip, ótinim túsirgenin aıtty. Olardyń arasynda túrli ulttyń ókilderi, kóp-balaly otbasylar men keshe ǵana shańyraq kótergen jastar, neshe túrli mamandyq ıeleri bolǵan. Jalpy, jeńimpazdardy anyq­taý barysynda konkýrstyń qala­lyq jáne aýdandyq komıssııalary otbasylyq dástúr, rýhanı-adamgershilik qundylyqtar, otbasy músheleriniń talanty men qol jetkizgen tabystary, sonymen qatar, shańyraqtyń qoǵamdaǵy abyroı-bedeli syndy mańyzdy kórsetkishterge basa mán bergen. Ulttyq konkýrstyń óńirlik kezeńiniń qorytyndysy boıyn­sha júldeli úshinshi oryndy Nu­ra aýdany atynan baq synaǵan Qaparovtardyń kópbalaly otbasy men Saran qalasynan qatysqan Jaıaýbaevtar otbasy ózara bólisti. Ekinshi júldege Qarqaraly aýdanynda turatyn Syzdyqovtar otbasy laıyqty dep sanaldy. Bul shańyraqtyń músheleri shetinen mýzykant, bilim berý salasynyń úzdikteri eken. Ekinshi jáne úshinshi júldege ıe bolǵan otbasylardy baıqaýdy uıymdastyrýshylar arnaıy dıplomdarmen marapattap, syılyqqa teledıdarlar tabys etti. Ulttyq baıqaýdyń birinshi júldesin Rakovtardyń sportshylar otbasy jeńip aldy. Bul shańyraqta dzıýdo kúresi boıynsha Qazaqstan jáne álem chempıondary bar. Osy otbasynan shyqqan álem chempıony Maksım Rakov qazirgi ýaqytta Rıo-de-Janeıro qalasynda ótetin Jazǵy Olımpıada oıyndaryna qyzý daıyndalyp jatyr. Al oblystyq «Mereıli otbasy» synynyń bas júldesi Jez­qazǵan qalasynyń juldyzy janǵan shańyraǵy – Meıramovtar áýletine buıyrdy. Meıramovtar úsh býynynda metallýrg mamandyǵyna qatysy bar áýlet eken. Olardyń jal­py eńbek ótili 440 jyldy quraı­dy! Shańyraqtyń tiregi men negizin qalaýshy Orazaly Meıramuly – KSRO-nyń Qurmetti metallýrgi, Qazaq KSR Memlekettik syıly­ǵynyń laýreaty, Lenın jáne Eńbek Qyzyl Tý ordenderiniń ıegeri, Jezqazǵan qalasynyń Qurmetti azamaty. Otaǵasy óziniń eńbek jolyn Qarsaqbaı kenishinde bastaǵan eken. Odan keıin Jezqazǵanǵa aýy­syp, mys quıý zaýytynyń domna peshinde 36 jyl, zeınet demalysyna shyqqanǵa deıin úzdiksiz eńbek etken. Qazirgi tańda aqsaqaldyń jasy 80-nen asqan. Áli tyń, qalalyq is sharalarǵa qatysyp, mektepterde ótip turatyn kezdesýlerdiń qurmetti qonaǵy bolyp turady. Aqsaqaldyń zaıyby Esenkúl Ibragımqyzy bolsa, «Altyn alqa» tósbelgisiniń ıegeri, toǵyz balany  tárbıelep ósirgen ardaqty ana. Bul kisi de metallýrgııa salasynda, kúkirt-qyshqyl sehynda 30 jyldan astam jumys istepti. Búgingi tańda bul otbasynyń eresek músheleriniń túgelge derligi metallýrgııa salasynda eńbek etip júr. Baq qonyp, bereke-birligi jarasqan shańyraqta 27 nemere, 40 shóbere ósip jatyr eken. Baıqaýdy uıymdastyrýshylar jeńimpaz otbasyn «Jartas» shıpajaıynda jaımashýaq demalýǵa múmkindik beretin joldamamen marapattady. Endi metallýrgter áýleti Meı­ramovtar «Mereıli otbasy» ult­tyq konkýrsynyń respýblı­kaly­q kezeńinde Qaraǵandy obly­synyń namysyn qorǵaıtyn bolady. Qaırat ÁBILDINOV, «Egemen Qazaqstan» QARAǴANDY