Tergeýshige para bergeni úshin 600 myń teńge aıyp tóleıdi

Aqmola oblysynda tergeýshige para bermekshi bolǵan azamat Stepnogorsk qalalyq sotynyń sheshimimen endi sol úshin 600 000 teńge aıyppul tóleıtin boldy. Buǵan qosa, kinálini ómir boıyna memlekettik qyzmette isteý quqyǵynan aıyryldy. Oqıǵanyń basy bıylǵy jylǵy aqpan aıynda Stepnogor qalalyq ishki ister bóliminiń Aqkól aýdany, Prıozernoe aýylynyń 62 jastaǵy turǵynyna qatysty is qozǵaýynan bastalǵan. Kúdiktige zańsyz qarý, jarylǵysh zattar men qondyrǵylardy saqtap, satyp alý jáne tasymaldaý baby boıynsha is qozǵalǵan. Qylmystyq isti tergeý barysynda bólim tergeýshisi bıylǵy 12 naýryzda kúdiktiniń úıine tintý júrgizedi. Sonyń barysynda ol tergeýshimen jeke qalǵan kezde oǵan para usynady. Sol kezde tergeýshi paradan bas tartyp, oǵan para usynǵany úshin zań aldynda jaýapqa tartylatynyn eskertken. Alaıda, er adam qoıarda qoıar bolmaı, ózine qatysty qylmystyq isti jaýyp tastaýdy ótinedi. Tergeýshi munyń sońynda kúdiktiniń áreketin Aqmola oblystyq ishki ister departamenti ózindik qaýipsizdik basqarmasyna habarlaıdy. Kúdikti 29 naýryzda Stepnogor qalalyq ishki ister bólimine jaýap alýǵa shaqyrylady. Tergeý áreketi aıaqtalǵan soń kúdikti taǵy da tergeýshige para usynyp, onyń jumys ústelindegi qaǵazdyń astyna 30 000  myń teńge qoıady. Sol jerde ishki ister departamenti jeke qaýipsizdik basqarmasy men jemqorlyqqa qarsy qyzmettiń qyzmetkerleri kúdiktini ustap, onyń ústinen Qylmystyq kodekstiń 367-baby, 1-bólimi boıynsha qylmystyq is qozǵalady. «Osyǵan oraı Stepnogor qalalyq soty kinálige jaza retinde  600 000  aıyppul salyp, oǵan qosa ómir boıyna memlekettik qyzmette isteý quqyǵynan aıyrdy», - dep kórsetilgen habarlamada. Baqbergen AMALBEK