Seriktiń erligi umytylmaıdy

Beıbit elge betaldy oq atqan qylmyskerdiń qolynan aýyr jaralanyp, Almaty qalalyq aýrýhanasynyń jan saqtaý bólimine túsken polısııa aǵa serjanty Serik Ábildaev ta kóz jumdy. Kúrti dep atalatyn aıadaı aýyldyń per­zenti, Almaty qalalyq IID Jergilikti po­­lısııa qyzmeti jol-patrýldik polkiniń aǵa serjanty Serik Ábildaev ke­zekti qyzmettik mindetin atqaryp júr­­­gende aıaqasty dabyl qaǵylyp, asa qa­ýipti qylmyskerdi qorshaýǵa alýǵa nus­qaý túsedi. Qarýlanǵan qylmyskerdi tut­qyndaý operasııasy ke­zinde aýyr jara­lanǵan Serik Ábildaevty dárigerler ajaldan arashalap qala almady. Ábildaevtardyń úıine tańala­keýimnen halyq kóp jınaldy. Kúrti aýylynda onyń asqar taýdaı ákesi, aq sút berip ósirgen anasy turady. Almaty oblysy ákiminiń orynbasary Baqtııar О́nerbaev qaraly úıdiń tabaldyryǵyn attap, marqumnyń áke-sheshesine, et jaqyn baýyrlaryna, týǵan-týystaryna qaıǵyryp kóńil aıtty. О́ńir basshysy Amandyq Batalovtyń da tosynnan kelgen qaıǵyǵa ortaq ekendigin jetkizip, mundaı aýyr jaǵdaıdyń endi qaıtalanbaýyn tiledi. Qaıǵyly otbasyǵa bılik tarapynan barlyq kómek jasalatynyna ýáde berip, «Seriktiń erligi – bizge óshpes ónege. Ol naǵyz azamatqa tán erlik kórsete bildi. Qaýippen betpe-bet keldi. Biraq taısalǵan joq. Keleshek urpaq onyń erligin maqtan tutatyn bolady. Seriktiń erligi ǵasyrlarǵa jalǵasady. Umytylmaıdy», dedi ol. Qaraly jıynǵa Almaty qalasy áki­mi­niń orynbasary Rýmıl Taýfıkov, Al­maty qalalyq IID basshysy, general-maıor Serik Kúdebaev, Aqshı jáne Kúrti aýyldarynyń turǵyndary keldi. Serik Ábildaevtyń rýhyna quran baǵyshtalyp, as berildi. Nurbol ÁLDIBAEV, «Egemen Qazaqstan»  Almaty oblysy, Ile aýdany