Grant kimge buıyrady?

L.N.Gýmılev atyndaǵy Eýrazııa Ulttyq ýnıversıtetinde bilim granttaryn bólý jónindegi respýblıkalyq konkýrstyq komıssııanyń otyrysy ótti. Bilim jáne ǵylym mınıstri Erlan Saǵadıevtiń tóraǵalyǵymen ótken komıssııa otyrysynda elimizdiń JOO-na qabyldaý jónindegi jumys qorytyndylandy. Mınıstr komıssııanyń óz jumysynda elimizdiń áleýmettik-ekonomıkalyq damý basymdyqtaryna – eń aldymen, Elbasynyń bastamasymen júrgizilip jatqan Qazaqstannyń ındýstrııalyq-ınnovasııalyq damýy, sondaı-aq, elimizdiń agroónerkásip kesheniniń damý maqsattaryn iske asyrý qajettilikterine nazar aýdarǵandyǵyn atap ótti. Atalǵan basymdyqtar es­kerile otyryp, 12 593 grant tehnıkalyq jáne teh­no­logııalyq mamandyqtarǵa, 5 000-ǵa jýyq grant – peda­gogıkalyq, 2 690 grant – aýyl sharýashylyǵy jáne veterınarııa mamandyqtaryna, 3000 grant – me­dı­sınalyq mamandyqtarǵa bólingenin tilge tıek etti. «Bıyl jalpy 31 702 grant bólinip otyr, onyń ishinde, 2 950 grant – JOO daıyndyq bólimderinde oqýǵa, 28 752 grant – JOO-nyń 1-kýrstarynda oqýǵa (kúndizgi oqý bólimderine – 28 452, syrttaı oqý bólimderine – 300 grant). Oqý granttary 87 JOO-ǵa bólindi. О́tken jyly 64 oqý orny qamtylǵan edi. Oqý granttaryn alý konkýrsyna 59 677 adam qatysty. Olardyń 47 342 – qazaq tilinde, 12 335-i orys tilinde oqıdy. «Máńgilik El jastary – ındýstrııa­ǵa!» jobasy aıasyndaǵy kvota boıynsha ótkiziletin konkýrs­­ta 9 797 adam baq synaıdy. Olardyń ishinde 2 208 «Altyn belgi» ıe­gerleri, 303 kolledj túlekteri, 169 halyqaralyq jáne respýblıkalyq olımpıadalarynyń jeńimpazdary, 854 halyqaralyq jáne respýblıkalyq ǵylymı jarystardyń jeńimpazdary, 948 halyqaralyq jáne respýblıkalyq sporttyq jarystardyń jeńimpazdary, 9 Prezıdenttik olımpıadanyń jeńimpazdary bar. Sonymen qatar, konkýrsqa 492 jetim bala, 363 I jáne II top múgedekteri, 37 soǵys ardagerlerine teńestirilgender sanatyndaǵy abı­týrıentter, 1053 QR azamattyǵy joq qazaq ulty ókilderi qatysady. Olarǵa kvotalar belgilenip otyr», – dedi E.Saǵadıev. Bıylǵy bilim granttary ıegerleriniń esimderi de jyl­daǵy dástúr boıynsha buqaralyq aqparat qu­ral­­darynda jarııalanatynyn esterińizge salamyz. Raýan QAIDAR, «Egemen Qazaqstan»