Qazaq kúresiniń qarymy

Bıyl Qytaıda Dúnıejúzilik qazaq kúresi federasııasynyń uıymdastyrýymen qazaq kúresinen álem chempıonatynyń jalaýy jelbireıdi. Álemdik doda Ile-Qazaq avtonomııaly oblysy Mońǵolkúre aýdanynda qyrkúıek aıynyń 21-25 aralyǵynda ótedi. Osy kúnderi tórtkúl dúnıeniń tórt buryshynan tól kúresimizden ótetin chempıonatqa óz elderinde jaýyrynyn jerge tıgizbeı júrgen balýandar jınalyp, kúsh synasady. Dúnıejúzilik qazaq kúresi federasııasynyń prezıdenti Serik Tókeevtiń aıtýynsha, bıylǵy chem­pıonatqa alǵash ret bes qur­lyqtyń balýandary qatysady. Sonyń ishinde qazaq kúresi jaqsy tanylyp úlgergen Azııa men Eýropa elderinen basqa, Afrıka, Amerıka men Avstralııa qurlyǵynan balýandar bar. Bıylǵy beldesýge jasyl qurlyqtyń balýan­dary da qatysamyz dep ótinishterin berip otyr. Buǵan deıin Avstralııanyń sportshylary qazaq kúresinen jarystarǵa qatysyp kórmegen edi. Bul jasyl qurlyqta tól kúresimizge degen qyzyǵýshylyqtyń artyp kele jatqanyn kórsetedi. Al álem chempıonaty ótetin Qytaı elinde qazaq kúresine degen kózqaras ózgergen. Sonyń bir dáleli retinde osy elde ulttyq kúresimizden chem­pıonattar men týrnırlerdiń jıi ótkizile bastaǵanyn aıtýǵa bolady. Jaqynda elimizge taǵy bir qýanyshty habar kelip jetti. Qy­taıda Dúnıejúzilik qazaq kúresi federasııasynyń istegen jumy­synyń arqasynda Shyńjań-Uıǵyr avtonomııaly aýdanynyń 10 aýdanynda, Ile-Qazaq avtonomııaly oblysynyń 3 qalasynda qazaq kúresinen federasııalar ashyldy. «Biz Qytaıdaǵy aǵaıynǵa alǵys aıtamyz. Buǵan eldegi kúres dese delebesi qozatyn qaýym qýanyp qaldy. Qytaıdaǵy qandastarymyz álem chempıonatynyń shyǵynyn da ózderi kóterip otyr. Osy jerde Qytaıdyń ShUAR-daǵy joǵary laýazym ıesi Ashat Kerimbaı myrzaǵa, Ile-Qazaq avtonomııaly oblysynyń burynǵy ákimi Qyzaıjan Seıilqojaulyna alǵysymyz erekshe. Bul azamattar tól kúresimizden jarystardyń ótýine qoldan kelgenshe kómektesip, qoldaý kórsetip keledi. Sonymen birge, Altaıdyń ar jaǵyndaǵy aǵaıynnyń arasynda qazaq kúre­sinen jarystar uıymdastyrýǵa atsalysyp júrgen baýyrymyz Serik Kenenbaıdyń eńbegi eren. Ol Qytaıda sońǵy eki jylda biraz jumystar jasap, ulttyq kúresimizdiń jalaýyn jelbiretti. Bıylǵy dodaǵa daıyndyqty da osy baýyrymyz atqaryp júr. Qytaıda Afrıka men Azııa elderinen kele­tin balýandardyń, sport dele­gasııalarynyń barlyq jol shyǵynyn da ózderimiz kóteremiz dep jatyr. Bul, árıne, Ile-Qazaq avtonomııaly oblysy Mońǵolkúre aýdany basshylarynyń qazaq kúresine degen qamqorlyǵyn bil­diredi», – dedi Serik Adamuly. Onyń aıtýynsha, álem chempıonaty kezinde qazaq kúresinen ǵylymı konferensııa ótedi. Oǵan tól kúresimizdi zerttep, zerdelep júrgen mamandar qatysyp, qazaq kúresi týraly baıandama jasaıdy. Bıylǵy álem chempıonaty osymen altynshy ret jalaýyn kóteredi. Ol alǵash ret 2006 jyly Almaty qalasynda ótse, odan keıin Reseıdiń Or qalasynda, 2010 jyly Astanada, 2013 jyly Bela­rýstiń Mınsk qalasynda ótti. Al sońǵy ret álemdik doda Reseıdiń Orynbor qalasynda ótkizildi. Dastan KENJALIN, «Egemen Qazaqstan»