«Marakanada» Olımpıada alaýy janyp tur

Rıo – 2016 Olımpıadasynyń ashylý saltanaty ataqty «Marakana » stadıonynda ótti. Brazılııa qazir ekonomıkalyq qıyndyqtardy basynan ótkerip jatqanymen jumyr jerdegi eń uly sportshylardyń biregeıi Peleni bergen memleket. Sondyqtan da qurmet joǵary bola bermek. « Marakana » Pele sııaqty saıypqyrandardyń mańdaı teri tógilgen qasıetti stadıon bolǵandyqtan da uly dúbirdi tamashalaýshylardyń qatary kóp bolǵandyǵy anyq. Jalpy, osy saltanatty sharany ótkizýge 21 mln. dollar jumsaldy dep habarlandy resmı derekte. Beıjiń olımpıadasynyń alaýyn qabyldap alǵan aǵylshyndar Londonda qytaılyqtar sekildi shashylmaıtyndyqtaryn aıtqan bolatyn. Olardyń London olımpıadasy oıyndaryna salǵan qarjysy Rıodan eki ese kóp bolǵanyn eskersek, bul sport saltanatynyń qorjynynyń búıiri solyńqy ekendigi bilinip qalady. Erinbegenderdiń bári Brazılııany jerden alyp jerge salyp jatqandyqtan arzanqoldaý ótken sport merekesi jaıynda osy jerden toqtaýdy jón kórdik. Rıo olımpıadasynyń Ellada elinen jetkizilgen alaýyn Brazılııanyń eń tańdaýly sportshylary qoldan qolǵa ótkizdi. Al, alaýdy tutatý qurmeti marafonshy Vanderleı Kordeırý dı Lımaǵa kórsetildi. Olımpıada oıyndarynyń ánuranyn balalar hory oryndady. Brazılııadaǵy Olımpıada-2016 oıyndarynyń uıymdastyrý komıtetiniń tóraǵasy Karlos Nýzman jaǵdaımen habardar etkennen keıin HOK prezıdenti Tomas Bah sóz alyp, dúnıe júzinen kelgen barsha qaýymdy uly merekemen quttyqtady. Tomas Bah óz sózinde birinshi ret olımpıada qozǵalysyna sińirgen qaıratkerler úshin Olımpıada ordeni bekitilgendigin aıtty. Eń birinshi orden eki dúrkin olımpıada oıyndarynyń jeńimpazy kenııalyq jelaıaq Kıpchege Keınoǵa tabys etildi. Olımpıada oıyndarynyń sherýine 207 memleket sportshylarymen qatyssa, Qazaqstan 40-y bolyp ótti. Elimizdiń Týy taekvondashy Rýslan Japarovtyń qolynda jelbiregen. «Marakanadaǵy» saltanatta Brazılııanyń prezıdenti mindetin ýaqytsha atqarýshy Mıshel Tımer Rıo-2016 olımpıadasynyń resmı ashylǵanyn habarlaǵanannan keıin túngi aspandy kúndizgideı jarqyratyp jibergen otshashýǵa kezek jetti. Olımpıada sherýinde bosqyn sporshylardan quralǵan top ótkende BUU-y prezıdenti Pan Ge Mýn men HOK prezıdenti Tomas Bah oryndarynan turyp qurmet kórsetti. Sport – dostyqtyń, beıbitshiliktiń merekesi. Sportta shekara bolmaıdy. «Marakanada» ótken sherýdiń sońy álemniń barsha túkpirinen kelgen sport jankúıerleriniń de ortaq, bir – birin tilsiz túsinisken merekesine aınaldy. Kóńilde bir ǵana túıtkil qalǵan. Álemdik tamashadan bir adamdy kóre almadyq. Ol – Pele. Kelemin depti. Alaýyn tutatamyn depti. Kelmedi, kele almady. Londonda marqum uly boksshy Muhammed Álıdi kórip edik. Qol arbamen kelip quttyqtaýyn aıtyp ketken. Parkınson syrqatynan tili tutqyrlanyp tursa da jetken edi. Pele ókpelese ýaqytsha úkimetke ókpelegen shyǵar. Ony alystan kórse de kóńiline medeý sanaıtyn, jas balasha qýanyp qaıtatyn, mundaǵy keleńsizdikterdi bir Pele úshin ǵana umytatyn jankúıerlerdiń jazyǵy qansha?, dep oıladyq. Qaıran, Pele kókem – aı. Biraq, sport toıynan jurt qur attaı jaıtańdap, kóńildi qaıtty. Alda 2016-jyl tamyz aıynyń teńdessiz kúnderi esigin aıqara ashyp tur. Baqtııar TAIJAN – Rıo-de-Janeırodan.