Bul – erekshe qamqorlyq

Elbasy bıylǵy halyqqa Joldaýynda da, odan keıingi «Nur Otan» halyqtyq-demokratııalyq partııasynyń kezekti HIII sezinde de jas urpaqqa bilim berý máselesine erekshe nazar aýdardy. Ásirese, bizdi qanattandyrǵan bir másele, 2016 jylǵa qaraı bilim berýge jumsalatyn shyǵyn IJО́-niń 5 paıyzyna deıin joǵary­laıtyny bolyp otyr. Sonymen qatar, bilim berýdiń tıimdi jolyn qarastyrý máselesi de alǵa mindettelgen. Osy bilim sapasyn kóterý jóninde qolǵa alynyp, qazir jumys isteı bastaǵan ıntellektýaldy 5 mekteptiń qatarynda bizdiń Astana qalasynda hımııa-bıologııa baǵytyndaǵy Nazarbaev zııatkerlik mektebi de bar. Bul bilim uıasy ótken jyldyń qyrkúıek aıynda ǵana óz jumysyn bastaǵan edi. Mekteptiń negizgi atqaratyn baǵyt-baǵdary týraly aıtar bolsam, birinshiden, dúnıejúzilik sapa men eńbek resýrstaryndaǵy bilimniń ótimdiligi, ekinshi – jeke-dara bilim men derbes qabilet­terdi baǵalaý, úshinshiden, jaratylystaný-matematıka baǵyttaryndaǵy pánderdi tereńdetip oqytý arqyly beıindi bilim berýdi qalyptastyrý, tórtinshiden, úshtuǵyr­ly til úlgisin iske asyrý, besinshiden, aq­parattyq-kommýnıkasııalyq tehnologııa­lar­dy engizý. Zııatkerlik mektepter osy maqsatty múltiksiz oryndaı otyryp, álemdik bilim keńistigine shyǵýdy qolǵa alýda. Sol sekildi mektep pen joǵary oqý oryn­darynyń arasyndaǵy baılanysty ny­ǵaıtý, jobalyq jáne zertteý jumys­taryn dáıim júrgizip otyrý basty nazarda. Biz profıldik pánder boıynsha mu­ǵalim­derdiń qyzmetterin júıeli uıymdastyryp otyrý úshin jaratylystaný baǵytyndaǵy kafedralar qurdyq. Ol negizinen hımııa jáne bıologııa pánderi muǵalimderin ha­lyq­aralyq deńgeıdegi ǵylymı-ádiste­melik júıe boıynsha oqýdy qalyptastyrý bolyp tabylady. Sol sekildi Otanymyzdaǵy bıologııa-hımııa salasynda jumys istep kele jatqan beldi mekemelermen baılanysty kúsheıte bastadyq. Olardyń qatarynda: elimizdegi jetekshi ǵylymı ortalyq bolyp sanalatyn «Ulttyq bıotehnologııalar or­ta­lyǵy» RMM, Bilim jáne ǵylym mı­nıstrliginiń ǵylym komıteti men Shortan­dydaǵy A.Baraev atyndaǵy astyq óndirý sharýashylyq ortalyǵy, taǵy basqalar bar. Qazir bizdiń mektep oqýshylary óz Otanymyzda ótken bilim saıystaryna qatysyp, júldegerler qatarynan kórinip keledi. Ondaı talantty oqýshylarymyz L.Álımanova, A.Muqasheva, D.Talǵatov, A.Altaev, M.Saıdýlla, E.Qaırýllaev, B.Turt­karın, Á.Turmahanov, Á.Mámet. Biz oqýshy­larǵa tek akademııalyq bilim berip qana qoı­maı, elin qadirleıtin, memleketin qurmet­teıtin tulǵa bolyp qalyptasýyna septigin tıgizetin daǵdylar men mádenıetterdiń ozyq úlgilerin de úıretip otyramyz. Jalpy, zııatkerlik mektepterdiń bir úlken ereksheligi, munda ár pán tereń­detilip oqytylýmen birge, onyń nátıjesin der kezinde baǵalap otyrý negizgi mindetimiz sanalady. Daryndy balanyń talant kózin ashý úshin sabaq berip qoıý óz aldyna, onymen jumys isteý, jan dúnıesin túsinip, oı-órisin ósirý máselesi birinshi kezekte turýy tıis. Al mektep pen ata-ananyń arasyndaǵy baılanys – bul úlken jaýapkershilikke jeteleıtin is. Sondyqtan da bolar, Prezıdenttiń partııa sezinde ata-analarǵa arnaıy qaıyrylyp, bilim berý men tárbıeni qatar júrgizý ár azamattyń paryzy, dep «Balanyń bas ustazy – ata-ana» degen baılamǵa toqtaýy bolyp tabylady. Ǵalııa SYZDYQOVA, hımııa-bıologııa baǵytyndaǵy Nazarbaev zııatkerlik mektebiniń dırektory. Astana.