Baǵdarlama shapaǵaty

Parlament Májilisiniń depýtattary Shavhat О́te­mi­sov, Keńes Ábsatırov jáne Sne­jana Imasheva Oral saý­da-ónerkásip kompanııasy ujymymen kezdesti. Parlamentshiler tańdaýy ózge emes, naq osy otandyq kompanııaǵa túsýi nelikten? Árıne, munyń ózindik syry men sebebi joq emes. Ras, búginde Oral óńirinde memlekettik baǵdarlamalardyń kómegimen óz isteriniń órisin ósirip otyrǵan kásiporyndar jetkilikti. Sonyń kósh basynda «Oral saýda-ónerkásip kompanııasy» JShS keledi. Parlament depýtattary, ásirese, munda «Bıznestiń jol kartasy-2020» memlekettik baǵdarlamasyna saı tyndyrylǵan ister qomaqty ekenine kóz jetkizdi. Munda baǵdarlamada belgi­len­gen qarjylaı qoldaý kózderiniń arqasynda óndiris aýqymy odan ári keńeıe túsipti. Ári bólingen qarajat tolyqtaı ıgerilgen. Kompanııa negizinen sý, gaz jáne munaı qubyrlaryn shyǵarýmen aınalysady. Onyń ishinde dıametri 1 600 mıllımetrlik qubyrlardyń elimizde eshqandaı balamasy joq. Kezdesý kezinde osyndaı básekelestikke tótep bere alatyn strategııalyq sıpattaǵy ónimderdi Reseıge eksporttaý múmkindikteri týraly jáne buǵan Eýrazııalyq ekonomıkalyq odaq sheńberinde júrgizilip otyrǵan keń aýqymdy sharalar da oń septigin tıgizgeni jan-jaqty sóz boldy. Búgingideı kúrdeli qarjy-ekonomıkalyq jaǵdaıda daǵ­darysty aýyzdyqtaý, kásip­oryn qyzmetkerlerin qysqar­týdyń qamytyna kıliktirmeý jáne jalaqyny ýaqtynda tóleý isiniń orny aıryqsha. Bul turǵyda Oral saýda-ónerkásip kompanııasynyń bási men mártebesi de bıik tur. Sondaı-aq, parlamentshiler kásiporyn basshysy Valerıı Krylovtyń tarapynan óndiristiń bolashaǵyna qatysty keń aýqymdy baǵdarlama belgilengenine de rızashylyǵyn bildirdi. Ásirese, munda kadr­lardy tárbıeleýge jáne irikteý men ornalastyrýǵa konseptýaldy kózqaras turǵysynan jan-jaqty kóńil bólinip otyrǵany qýantady. Osy oraıda, atalmysh kompanııadan ózge áriptesteriniń úırenetin tustary da az emestigi baıqalady. Atap aıtqanda, kompanııa basshysynyń bolashaq kadr­lardy joǵary jáne arnaýly oqý oryndarynan ózi izdep júrip tańdaıtyny, olarǵa óndiris pen ónerkásip taqyrybynda leksııa­lar oqıtyny, stýdentterdiń óndiristik tájirıbeden ótýine jan-jaqty kóńil bóletini aıtýǵa turarlyqtaı. Sonymen birge, kompanııa qarajaty esebinen shetelde oqyp júrgen jas­tar da bar eken. Temir QUSAIYN, «Egemen Qazaqstan» Batys Qazaqstan oblysy