Astanada olımpıadashylarǵa qurmet kórsetildi

Astanada Ulttyq Olımpıada komıtetiniń prezıdenti Tımýr Qulybaev pen Mádenıet jáne sport mınıstri Arystanbek Muhamedıuly Olımpııalyq oıyndardyń chempıondarymen jáne júldegerlerimen kezdesti. Kezdesýge sportshylarmen birge jattyqtyrýshylar, Olımpıadaǵa elimizdiń delegasııasynyń quramynda barǵan sport mamandary qatysty. Jıynda UOK prezıdenti men Mádenıet jáne sport mınıstri otandastarymyzdy jeńisterimen quttyqtap, Olımpıadaǵa qatysty óz oılaryn ortaǵa saldy.  Onda aldymen Ulttyq Olımpıada komıtetiniń basshysy sóz alyp, sportshylarǵa rızashylyǵyn bildirdi. –Sizderdi Olımpıadanyń sátti aıaqtalǵanymen quttyqtaımyn. Olımpıada bizdiń sportshylar úshin el namysyn abyroımen qorǵap, otansúıgishtigimizdi kórsetetin jarys alańy boldy. Sportshylarymyzdyń jeńisi elimizde sportty damytýda tıisti jumystardyń jasalyp jatqanyn kórsetti. Qazaqstan Olımpıadada eshqashan 17 júlde alyp kórgen emes. Sizder jarys alańynda namysqa tyrysyp, osy medaldardy jeńip ákeldińizder, – dedi ol. Odan ári Tımýr Asqaruly otandastarymyzdyń Olımpıadadaǵy jarystaryn eske alyp, ózi kórgen oqıǵalardy aıtyp berdi. –Men Olımpıada bastalar aldynda Rıo-de-Janeıroǵa kelgenimde mynadaı bir qyzyq nárseni kórdim, – dedi ol. – Biz jarys ótetin jerlermen tanysyp júrgende basqa bir elderdiń sportshylarynyń Qazaqstannyń týy astynda jattyǵyp jatqanyn kórdik. Muny bizdiń elge jaqsy yrym boldy dep baladyq. Sol kezde ishimizden aıtqanymyz keıin iske asyp, elimizdiń kók baıraǵy bir emes, birneshe ret Brazılııa aspanynda qalyqtap, ánuranymyz oınaldy. Kezdesýde ol Olımpıadada keıbir otandastarymyzdyń júlde ákeletinin kútpegenin aıtyp, degenmen sportshylarymyzdyń jaqsy óner kórsetetine bek senimdi bolǵanyn  aıtty. –Olımpıada aldynda maǵan Dmıtrıı Balandınniń chempıon bolýy múmkin ekenin eskertti. Sodan bastap bul jigitke úmitimiz artty. Endi, mine ózderińiz kórip otyrǵandaı Dmıtrıı Balandın – Olımpıada chempıony. Mundaı sportshymen tek maqtaný kerek. Al jalpy, Qazaqstan quramasy sporttyń barlyq túrinen Olımpıadaǵa jaqsy daıyndaldy. Osy jerde Mádenıet jáne sport mınıstrligine alǵys aıtqym keledi. Bizdiń sportshylarymyz Brazılııaǵa sútten aq, sýdan taza bolyp bardy. Biz Olımpıada aldynda halyqaralyq sport komıtetiniń basshysy Tomas Bahqa Qazaqstan quramasynyń Olımpıadaǵa jaqsy daıyndalyp, eshqandaı dopıng qoldanbaı, taza bara jatqanyn aıttyq. Sol úshin tıisti analızder tapsyryp, Germanııaǵa jiberdik. Sońynda taza ekenimizdi dáleldedik. Sportta tazalyq eshqandaı nátıjeni almastyra almaıdy, – dedi ol. Osydan keıin Mádenıet jáne sport mııstri sóz alyp, sportshylar men jattyqtyrýshylardyń eńbegin ulttyq quramanyń jarysqa jaqsy daıyndalǵanyn, sol úshin  Ulttyq Olımpıada komıteti men jattyqtyrýshylarǵa, osy iske basynan sońyna deıin aralasqan basqa da sport mamandardyń eńbegin  bas barmaqpen baǵalaıtynyn aıtty. Kelesi kezekte sóz Olımpıada chempıondary men júldegerlerine berildi. Aldymen boksshy Danııar Eleýsinov minberge shyǵyp, UOK prezıdentine Olımpıadada ǵana emes, oǵan daıyndyq kezinde de kórsetken qoldaýyna alǵys bildirdi. –Bizdiń  jeńip alǵan júldelerimizde sizdiń de eńbegińiz bar. Bizdiń jeńiske jetýimizge bar kúshterin, sheberlikterin jumsaǵan jattyqtyrýshylarymyzǵa shyn júrekten alǵys aıtamyn. Bizdiń dańqty boksshylarymyz Vasılıı Jırov, Ermahan Ybyraıymov, Bekzat Sattarhanov, Baqtııar Artaev, Baqyt Sársekbaev, Serik Sápıev syndy aǵalarymyzdyń jolyn qýyp, olımpııalyq rıngte elimizdiń kók týyn jelbiretkenimiz úshin ózimdi baqytty sanaımyn. Biz Olımpıadada Qazaqstan boksynyń álemniń úzdik ekenin taǵy dáleldeı aldyq, – dedi Danııar Eleýsinov. Olımpıadada alǵan áseri týraly júzgish Dmıtrıı Balandın de aıtyp berdi. –Fınalda júzip bolǵannan keıin, tabloǵa qarasam eshnárse túsinbedim. Qatelik bolǵan shyǵar dep oıladym. Sodan keıin ǵana qurmet tuǵyryna shyqqanda jeńiske jetkenimdi sezindim. Sol jerde elimizdiń ánurany shyrqalyp, kók týymyz kóterilgende boıymdy barlyq Qazaqstan halqy úshin maqtanysh sezimi kernedi. Bul sezimdi jetkizý qıyn. Qazaqstanǵa sondaı sezimdi syılaǵanyma qýandym. Jeńis tuǵyrynda elimizdiń kók baıraǵynyń ózgelerden bıik turǵanyn maqtan tuttym, – dedi Olımpıada chempıony. Áıelder kúresinen kúmis júldegeri Gúzelú Manıýrova da Olımpıadadaǵy sportshylarymyzdyń jeńisi búkil elimizdiń ortaq jeńisi ekenin atap ótti. –Fınalda birtúrli sezim boldy. Kúmis júlde aldym. Altyn medalǵa sál ǵana jetispedi. Soǵan ókinemin. Bul da bir synaq bolǵan shyǵar. Kúmis júlde meni aldaǵy jarystarǵa qaırap, qulshynys beredi. Ekinshi jaǵynan, ekinshi oryn ókshemizdi basyp kele jatqan jastarǵa da úlgi bolsa deımin. Solar bizdiń Olımpıadadaǵy jeńisterimizge qarap boz túzese degen tilegim bar, – dedi Gıýzel Manıýrova. Osydan keıin bokstan ulttyq qurama komandanyń bas jattyqtyrýshysy Myrzaǵalı Aıtjanov sóz alyp, jarysta bolǵan básekelestik týraly aıtty. –Qazir álemde boks jyldam damyp jatyr. Sonyń ishinde Olımpııalyq oıyndarda boks qarqyndy damyp kele jatqanyn kórsetti. Bizdiń ulttyq qurama komanda Olımpıadaǵa jaqsy daıyndaldy. Jigitter men qyzdardyń ónerine rızamyn. Bir altyn, eki kúmis, eki qola medal jeńip aldyq. Osy rette ulttyq quramanyń Olımpıadaǵa daıyndalýyna barlyq jaǵdaı jasaǵan Qazaqstan boks federasııasyna alǵys aıtamyn. Qazaqta «Baq qaıda barasyn? Yntymaǵy jarasqan elge baramyn», degen sóz bar. Elimizdiń yntymaǵy, birligi bolsa sportta da jeńisterimiz kóp bolady. Yntymaǵymyz árqashan jarasa bersin, deı kelip, Myrǵaǵalı Aıtjanov kelesi Olımpıadada budan da jaqsy nátıje kórsetetinderin málimdedi. Jıynnyń sońynda Olımpıadada baspasóz ortalyǵynyń jetekshisi qyzmetin atqarǵan Baqytjan Ordabaev Olımpıada jańalyqtaryn berip, reportaj jasaǵan jýrnalısterdiń jumysyn bas barmaqpen baǵalady. Ol jarys kezinde elge jańalyq taratqan aqparat qural ókilderiniń jumysy ońaı bolmaǵanyn, bizidń olımpıadashylardyń jeńisterin solar elden buryn habarlap, elge laıyqty qyzmet etkenin atap ótti. Dastan KENJALIN