Túrkistandyqtar kórmesiniń tarıhı kelbeti

Ult murasyna uqyptylyqpen qarap, ótkenimizdi óshirmeı, sary altyn saqtalǵan sandyqtaı bolyp kele jatqan rýhanı oshaǵymyzdyń biri – Ulttyq mýzeı bolar. Keshe qazynaly qara shańyraq Q.A.Iаsaýı atyndaǵy Halyqaralyq qazaq-túrik ýnıversıtetimen birlesip, el Táýelsizdiginiń 25 jyldyǵyna arnalǵan «Uly Dala tarıhy» atty sýret kórmesin ashty.  Kórmege atalmysh ýnıversıtettiń óner fakýltetiniń oqytýshylary men magıstranttary jasaǵan 40 qylqalam týyndysy qoıyldy. Túrkistannan jetken kórme «Uly Dalanyń uly tulǵalary» jáne «Uly Dalanyń uly oqıǵalary» degen eki bólimnen turady. Sýret­terdiń taqyryptary muqııat tańda­lyp, ýnıversıtettiń tarıhshy-arheo­logtary tarapynan kórkemdik sarap­tamadan ótken eken. «Kórmeniń basty maqsaty – Uly Dalanyń tarıhı oqıǵalary men el taǵdyryndaǵy orny erekshe tulǵalaryn kórkemdik turǵydan qaıta kórsetý arqyly jastardy  otansúıgishtikke baýlý. Olardyń eren erlikterin el esinen umyt qalmaýy úshin eńbek etý. Osy jaz aılarynda, demalys ýaqyttarynda shetelden bolsyn, ózimizdiń qazaqstandyqtar bolsyn Astanaǵa demalyp kelgende Ulttyq mýzeıge soqpaı ótpeıdi. Sol kezde bizdiń osy kórmege qoıǵan dúnıelerimizdi kórip, tarıhymyzben tanysyp jatsa, bizdiń eńbegimizdiń janǵany», – dedi Q.A.Iаsaýı atyn­daǵy Halyqaralyq qazaq-túrik ýnıversıtetiniń prezıdenti Ýálıhan Ábdibekov. Kópshilik nazaryna usynylǵan kórmege «Botaı eldi mekeni», «Qazaq dalasyndaǵy ań aýlaý ónerinen kórinis», «Saq basshysy – Altyn adamdy jerleý rásimi», «Otyrar monshasy», «Taıqazan», «Otyrar kitaphanasy», «Qoja Ahmet Iаsaýı kesenesiniń qurylysy» jáne t.b. sýretterde bizdiń zamanymyzǵa deıin­gi bes myń jyl burynǵy Botaı máde­nıetinen bastap, búgingi kúnge deıingi aralyqtaǵy ulttyq tarıh pen mádenıettiń artefaktisine aınalǵan mádenı-rýhanı jáne materıaldyq eskertkishter beınelengen. Tarıhı oqıǵalar men tuǵyr­ly tulǵalarymyzdy beınelegen kórme 25 qyr­kúıekke deıin jalǵasady. Raýan QAIDAR, «Egemen Qazaqstan»