Ekeýi synaqtan ótip, úshinshisi saılaýǵa túsýden bas tartty

Keshe Ortalyq saılaý komıssııasynda Qazaqstan prezıdenttigine taǵy eki kandıdat Lıngvıstıkalyq komıssııaǵa memlekettik tilden synaq tapsyrdy. Sondaı-aq, kún qorytyndysy boıynsha eki úmitker ózderin qoldaýǵa qol jınaý úshin qol qoıý paraqtaryn aldy. Taǵy bir kandıdat saılaý naýqanyna odan ári qatysýdan bas tartty. Alǵashqy bolyp synaqqa Qa­zaqstannyń Kommýnıstik halyq­tyq partııasynan usynylǵan úmit­ker Jambyl Ahmetbekov keldi. Emtıhan qorytyndysy boı­yn­sha Lıngvıstıkalyq komıssııa ashyq daýys berý arqyly J.Ahmetbekov qazaq tilin erkin meń­gergen degen biraýyzdy sheshim qabyldady. Komıssııa tóraǵasy Myrzataı Joldasbekov atap ótkendeı, kandıdat «Astana – bas qala» ta­qy­ry­byna jaqsy shyǵarma jaz­ǵan. Or­fografııalyq qateleri joq. Tek eki pýnktýasııalyq qate men eki stı­lıs­tıkalyq jónsizdikke jol bergen. Ekinshi tapsyrma – kórkem oqý boıynsha kandıdat Ahmet Baıtur­synovtyń shyǵarmasyn jaqsy da mazmundy etip oqyp shyqqan. Úshinshi tapsyrma – «Adam jáne tabıǵat» taqyry­byndaǵy erkin áńgime barysynda da ol ózin jaqsy qyrynan kórsete bilgen. Memlekettik tildi bilýdiń synaǵynan taǵy bir úmitker –Sovetqazy Nursıla da tabysty ótken. Qorytyndy sheshimdi ha­barlaǵan M.Joldasbekov S.Nur­sılanyń shyǵarmany «Otan» ta­qyrybyna jazǵanyn aıtty. «О́ki­nishke qaraı, kandıdat taqy­ryp­ty tolyq asha alǵan joq, biraq shyǵarma jaza alatynyn  kórsetti. Ekinshi tapsyrma boı­yn­sha ol Muhtar Áýezovtiń «Abaı joly» romanynan úzindi oqydy. Bul synaqta kandıdat ortasha deńgeı kórsetti, óıtkeni, keıbir áripterdi «jutyp» qoıyp otyrdy. Úshinshi tapsyrma boı­ynsha ol «Memlekettik til – biriktirýshi faktor» taqyrybynda sóz qozǵady. Taqyrypty tolyq­taı asha alǵan joq. Taqyrypta kórsetilgen jáıt­ten aýytqyp, tildiń már­te­besi men proble­ma­la­ry týraly aıtyp ketti. Desek te, úmitkerdiń qazaqsha jaqsy oılaı biletini kórinip turdy. Barlyq argýmentterdi esepke ala kele, komıssııa  músheleri S.Nursıla qazaq tilin biledi degen qory­tyndyǵa keldi», dedi M.Joldasbekov. Alaıda, synaqtan soń ile-shala Sovetqazy Nursıla saılaý naýqanyna odan ári qatysýdan bas tartyp, óz kandıdatýrasyn alyp tastady. OSK-ge  tıisti málimdememen shyqqan ol Konstıtýsııada qarastyryl­ǵanyn­daı, Qazaqstannyń ár azamaty­nyń prezıdenttikke kandıdat­tyq­qa túsýge tolyq quqyǵy bar ekenine kózi jetkenin atap ótti. – Meniń maqsatym da osyny bilý bolatyn, – dedi S.Nursıla. Keshe Ortalyq saılaý komıs­sııasy Qanat Týrageldıev pen Jambyl Ahmetbekov el zań­namalary talabyna sáıkes prezıdenttik saılaýǵa qatysa alady degen sheshim shyǵardy. Sóıtip, qos kandıdatqa qol jınaý úshin qol qoıý paraqtaryn berdi. Álısultan QULANBAI.