Sodan keıin penaltı serııasynda Qazaqstan komandasy qarsylastaryna qaraǵanda qaqpany dál kózdep, 6:5 esebimen utty. Al kezdesýdiń negizgi ýaqytynda Ahmet Sháripov dýbl jasady. Sóıtip, elimiz quramasy alǵash ret shaǵyn fýtboldan áýesqoılar arasyndaǵy Eýropanyń basty dodasyn jeńip aldy. «Qazaqstan áýesqoı fýtbol lıgasy» qoǵamdyq birlestiginiń tóraǵasy Erlan Jarylqasynovtyń aıtýynsha, bul synǵa saıdyń tasyndaı iriktelgen 32 komanda qatysty. Olar 8 topqa bólinip, qart qurlyqtyń júldesin sarapqa saldy. Qazaqstan S tobynda Bosnııa jáne Gersogovına, Avstrııa jáne Lıtva quramalarymen kezdesti. Al pleı-off kezeńinde 1/16 fınalda Germanııamen oınap, 1:1 esebimen aıaqtalǵan matchta penaltı serııasynda jeńiske jetti. Odan keıin 1/8 fınalda Majarstandy 5:1, shırek fınalda Bosnııa jáne Gersogovınany 3:1 esebimen utsa, jartylaı fınalda Chehııadan 3:0 esebimen basym tústi. - Eýropa dodasyna elimizdiń atynan «Esil» komandasy qatysty. Bul klýb Astana qalasynyń áýesqoı fýtbolshylar lıgasynda óner kórsetedi. Olar qalalyq lıgany jeńip alǵannan keıin Qazaqstan chempıony atanyp, Eýropa dodasyna joldama alǵan bolatyn. Qazaqstan 2012 jyldan beri Eýrododasyna qatysyp keledi. Bul synǵa kári qurlyqtyń áýesqoılar arasyndaǵy shaǵyn fýtbol federasııasyna múshe elder qatysa alady. Al Qazaqstan oǵan 2012 jyldan beri múshe. Buǵan deıin elimizdiń atynan «Saıran», «Semeı» sııaqty komandalar jarysqa qatysqan edi. Olar da Eýropa chempıonatynda laıyqty óner kórsetti. Bizdiń komandalar toptan shyǵyp, 1/8 fınalǵa, shırek fınalǵa deıin jetti. Al bıylǵy dodaǵa Qazaqstannyń komandasy osymen besinshi ret qatysty. Onda «Esil» klýby elimizdiń namysyn qorǵap, kári qurlyqtyń aspanynda kók baıraǵymyzdy bıikte jelbiretti, ánuranymyzdy shyrqatty. Bul jeńis «Esil» klýbynyń ǵana emes, ol elimizde áýesqoı fýtboldy damytýǵa atsalysyp jatqan bárimizdiń ortaq jeńisimiz. Bizdiń komanda jeńiske jetkende quttyqtaýshylar óte kóp boldy. Olar Qazaqstanda shaǵyn fýtboldan áýesqoılar arasyndaǵy fýtboldyń júıeli, josparly túrde damyp jatqanyna kóz jetkizdi. Biz shynynda da elimizde áýesqoı fýtboldy damytýǵa, ony nasıhattaýǵa bar kúsh-jigerimizdi salyp kelemiz. Qazir Eýro dodasyna áýesqoı fýtbolshylar lıgasy komandasynyń Almatydan qatysyp jatyr degen qate túsinik bar. Bul durys emes. Qurlyqtyq chempıonatqa qatysyp jatqan jasaqtar Astanada qurylǵan áýesqoı fýtbolshylar lıgasynyń komandalary. Qazirgi kezde bizdiń lıganyń elimizdiń kóptegen oblystarynda fılıaldary jumys isteıdi. Mysaly, lıganyń Almaty, Aqtaý, Semeı, Aqtóbe, Atyraý, Pavlodar, Petropavlovsk, Shymkent qalalarynda fılıaldary bar, - deıdi «Qazaqstan áýesqoı fýtbol lıgasy» qoǵamdyq birlestiginiń tóraǵasy Erlan Jarylqasynov. Astana qalalyq áýesqoı fýtbolshylar lıgasyna «Egemen Qazaqstan» gazetiniń komandasy da qatysqan. Gazettiń shaǵyn fýtboldan jasaǵy 2010-2015 jyldar aralyǵynda «A» jáne «V» lıgasynda óner kórsetken. Dastan KENJALIN
