Almatyda «Eýrazııa barysy» týrnıri ótedi

2 qazan kúni Almatyda qazaq kúresinen «Eýrazııa barysy» týrnıri ótedi. Bul týraly Ýnıversıadany daıyndaý men ótkizý jónindegi uıymdastyrý komıteti habarlady. Bıylǵy týrnırdi Almatyda jańadan salynǵan «Almaty Arena» sport kesheninde ótkizý josparlanyp otyr. Týrnır elimiz táýelsizdiginiń 25 jyldyǵy men qalanyń 1000 jyldyǵyna arnalady. Oǵan 8 elden 130 balýan qatysady. Ol tikeleı translıasııada KazSport jáne «Boes» arnalarynan kórsetiledi. «8 eldiń eń myqty balýandary «Eýrazııa barysy» ataný úshin saıysqa túsedi. Almaty qalasynyń óziniń 1000 jyldyq toıynda osyndaı mártebeli jarysty ótkizetinine qýanyshtymyz. Bul «Almaty Arenada» ótetin eń birinshi halyqaralyq týrnır bolady», dedi qalalyq qazaq kúresi federasııasynyń vıse-prezıdenti Maqsat Qıqymov. «Eýrazııa barysyn» atalǵan sport kesheniniń áleýetin baıqap kórý úshin de ótkiziledi. О́ıtkeni, onda 2017 jyldyń qańtar men aqpan aılarynda qysqy Ýnıversıada oıyndarynyń ashylý jáne jabylý saltanaty men mánerlep syrǵanaý jáne kerlıngten saıystar ótedi. Sondaı-aq, qyrkúıek aıynan bastap, «Almaty Arenada» qazaq kúresimen aınalysýǵa arnalǵan zal ashylady dep josparlanǵan. Onda kún saıyn, kúresten kúndizgi jáne keshki jattyǵýlar ótkiziledi. «Eýrazııa barysy» týrnıri ótetin «Almaty Arena» sport kesheni 12 myń adamǵa arnalǵan. Dastan KENJALIN