Syr elinde Konstıtýsııa kúni merekesine oraı 124 otbasyǵa páter berildi. Saltanatty sharaǵa oblys ákimi Qyrymbek Kósherbaev qatysyp, qyzylordalyqtardy mártebeli merekemen quttyqtady. Ol: «Táýelsiz elimizdiń Tuńǵysh Prezıdenti Nursultan Ábishuly Nazarbaev halyqty, sonyń ishinde kómekke muqtaj azamattardy qoldaý jóninde árqashan aıtyp keledi. Kórsetiletin qoldaýlardyń bastysy – baspanamen qamtamasyz etý. Bul maqsatta qabyldanǵan memlekettik baǵdarlamalar aımaǵymyzda sátti júzege asyp, búginde «Alashtyń anasy» atanǵan qasıetti meken qarqyndy qurylys aımaǵyna aınaldy. Aımaqta áleýmettik nysandardan bólek, turǵyn úılerdiń de kóptep salynyp jatqanyn eshkim jasyrmaıdy. Oblysta byltyrdyń ózinde qurylys kólemi 3,5 esege ósse, onyń ishinde Qyzylorda qalasynda atalǵan kórsetkish 8 esege artty», – dedi. Aımaq basshysy sonymen qatar, sońǵy 3 jylda Qyzylorda qalasy boıynsha jalpy aýdany 265 myń sharshy metrdi quraıtyn, 3,5 myń páterlik 82 kópqabatty turǵyn úıdiń qurylysy júrgizilgenin aıtty.
Oblys ákiminiń sózine súıensek, óńirde bıyl 80 kópqabatty turǵyn úıdiń qurylysy júrgizilip, úsh jylda Qyzylordada jańadan 11 shaǵyn aýdan boı kótergen. Sondaı-aq, búginde «Turǵyn úı qurylys jınaq banki» baǵdarlamasy boıynsha 100 páterden turatyn 2 úı tapsyrylsa, aldaǵy jeltoqsanda «Araı-3» shaǵyn aýdanynda taǵy 200 páterlik 6 úı paıdalanýǵa beriledi. Jalpy alǵanda, osy jyldyń qorytyndysy boıynsha oblysta «О́z úıim» baǵdarlamasy aıasynda 20 myń sharshy metrden astam baspana tapsyrylady. Bul paıdalanýǵa berilip otyrǵan turǵyn úıler elimizde memleket tarapynan turǵyndardyń ál-aýqatyn arttyrýǵa jasalyp jatqan qoldaýdyń naqty kórinisi.
Búginde Tasbóget kentindegi Amangeldi kóshesinen memlekettik qyzmetker, quqyq qorǵaý salasy, el namysyn qorǵaǵan sportshylar men medısına salasy qyzmetkerlerine arnalǵan 24 páterlik úı paıdalanýǵa berildi.
Talǵat RAIYMBEK
