Boks. Ǵalym Kenjebaev: «Báseke bar jerde nátıje bar»

Bokstan Qazaqstannyń jastar qurama komandasy Germanııanyń Oderdegi Frankfýrt qalasynda ótken dástúrli Brandenbýrg kýbogy týrnırinen keldi. Bul synda boksshylarymyz 4 altyn, 3 kúmis jáne 2 qola medal ıelendi. Boksshylardyń osy jeńisine baılanysty jastar qurama komandasynyń bas jattyqtyrýshysy Ǵalym Kenjebaev Germanııada ótken týrnır týraly egemen.kz saıtyna oılarymen bólisti. –Bıylǵy týrnırde básekelester óte kóp boldy. Týrnırge Reseı jaqsy daıyndalypty. Olar myqty komanda ákeldi. Qarasha aıynda Sankt-Peterbýrgte jastar arasynda álem chempıonaty ótedi. Reseı osy dodaǵa shyndap kirisken sııaqty. Biz de qarap jatqan joqpyz. Brandenbýrg kýbogy týrnırinde álem chempıonatyna qatysatyn komandalardy zerttep kórdik. Álem chempıonatynda bizdiń basty qarsylasymyz Reseı men Kýbanyń quramalary bolady. Týrnırde kýbalyqtar bolǵan joq. Biraq, biz olardy Anapada ótken týrnırde kórgenbiz, – dedi ol. – Bostandyq eliniń boksshylary  Anapada jaqsy qyrynan kórindi me? Aldaǵy álemdik dodada Reseımen de Kýbamen de ıyq túıistirip básekelesýge bola ma? –Árıne, Reseı men Kýbada myqty boksshylar kóp bolǵanymen olarmen árqashan ıyq teńestirip básekelesýge daıynbyz. Bizdiń elde boks mektebi bar. Qazaqstan álemdegi boks derjavalarynyń biri sanalady. Jas bolsa da bas bola biletin jastarymyz ósip keledi. Sharshy alańda shyńdalyp jatqan jastar bar. Al Brandenbýrg kýbogy Olımpıada kezinde bastalyp, keshe ǵana bitti. Bıyl ol 21-shi ret jalaýyn kóterdi. Týrnır 2008 jyly Olımpıada kezinde de ótken bolatyn. Sol kezde oǵan Danııar Eleýsinov pen Ivan Dychko qatysqan. Bul týrnır jastar úshin mańyzdy. Kezinde ony Gennadıı Golovkın de jeńip alǵan. Men osyny qurama komandaǵa únemi aıtyp júremin. Solarǵa qarap boı túzeńder dep aıtamyn. О́ıtkeni, osy týrnırdi jeńip alǵan adam jaman boksshy bolmaıdy. Ony jeńý kim-kimge bolsyn abyroı, mártebe. – Qurama komanda jıi ózgerip tura ma?  Qosalqy qurammen problema joq pa? - Komanda jıi ózgerip turady. Al komandanyń rezervi burynnan beri bar. Ol árqashan bola beredi. Bizdiń elde boks jaqsy damyp jatyr. Boks federasııasy jastar boksyn damytý úshin qolda bar múmkindikterdi jasap otyr.  Sporttyń osy túrine elimizde úlken mán beriledi. Elimizde boks ortalyqtary, sport keshenderi bar. Olar kóbeıe beredi. Sport keshenderiniń kóbeıgeni jastarǵa jaqsy. Qazir óz basym kóshede bos júrmeı, sport alańdaryna baratyn jastardyń talaıyn kórip júrmin. Meniń oıymsha, Danııar Eleýsinovtiń altyn medali, Ádilbek Nııazymbetov, Vasılıı Levıt, Ivan Dychko men Darıǵa Shákimovanyń júldeleri jastarǵa jaqsy áser etip jatyr.  Bir ókinishtisi, bizdiń elde aýyr salmaqtaǵy jastar az. Sondyqtan aýyldarǵa baryp, el-eldi aralap aýyr salmaqtaǵy jastardy izdeýimiz kerek. – Komandanyń aldaǵy jospary qandaı? 12 – 19 qyrkúıek kúnderi Ýkraınada aǵaıyndy Klıchkolardyń týrnıri ótedi. Soǵan baramyz. Oǵan Brandenbýrg kýbogy týrnırine qatysqan 75 jáne 81 kıloǵa deıingi salmaqtaǵy boksshylardy aparamyz. Basqa salmaqta basqa boksshylar barady. О́ıtkeni, bizde jeńil salmaqta báseke kúshti. Sodan keıin qazan aıynda Halyqaralyq áýesqoı boks qaýymdastyǵynyń akademııasynda ótetin jıynǵa qatysamyz. Al qarashada álem chempıonatyna sońǵy daıyndyqty jasaımyz. Álemdik doda 14-26 qarasha kúnderi ótedi. Dastan KENJALIN