Adamzattyń taǵdyry alańdatqan

Jasyratyny joq, Semeı polıgonyn eshkim ashyq aıta almaıtyn. Keńes zamanynda Semeı polıgony ult dertiniń jasyryn oshaǵy boldy. Elimiz táýelsizdikke qol jetkizgen kezde ǵana bul másele qoǵamdyq deńgeıde kóterilip, álem elderiniń nazaryn aýdardy. Elordada ótken «Iаdrolyq qarýsyz álem qurý» atty halyqaralyq konferensııa osynyń aıǵaǵy. Elbasymyz «Álem. HHI ǵasyr» Manıfesi jalpy adamzat aldyndaǵy qaýipti ashyq aıtyp, jetekshi derjavalar arasyndaǵy teketirestiń jahandyq soǵysqa ulasýynan qaýip­te­netinin, Mem­leket basshysy retinde alań­daıtynyn álem nazaryna saldy. Azýy aıdy bilegen qanquıly dáýirden de ótip, eńsesin kóterip, esin jıǵan Qazaq eliniń bastan keshkeni bul jıynda da búkpesiz aıtyldy. Jıyrma bes jyl bu­ryn jer betinen joıylyp ketýdiń az-aq aldynda qalǵan qarasha jurttyń qasireti men janaıqaıyna qulaq asqysy kel­megenderdiń bir sát oılanyp, kidirip qalýyna týra kelgendeı. Estigenin aıtýǵa, kórgenin jarııalaýǵa bolmaıtyn shiderlige jan bitip, álem qaýymdastyǵynyń aldynda oı tastaldy. Jeti basty aıdaharǵa jan bitirgisi keletin adamzat oıynyń ushqyr qııaly bir sát demin jutyp, kúnásiz qurbandardyń kóz jasynan bas tartýdy da qalaıtyn kún týar. Nazym Hıkmet: «Sen janbasań lapyldap, Ol janbasa lapyldap, Biz janbasaq lapyldap, Aspan qalaı ashylmaq», depti. Myń ólip, myń tirilgen qazaq jurtynyń aspany ashylyp, Máńgilik Elge jol bas­taıtyn kún týdy. Roza MUQANOVA, Qazaqstannyń eńbek sińirgen qaıratkeri, jazýshy-dramatýrg Astana