Aýqymdy baılanystar arnasy

О́tken seısenbide Aqordada Qazaqstan Respýblıkasynyń Memlekettik hatshysy Gúlshara Ábdiqalyqova men Bolgarııa Vıse-prezıdenti Margarıta Popova kezdesip, ekijaqty qarym-qatynastardyń ózekti máselelerin talqylady. Kezdesý barysynda G.Ábdiqalyqova birinshi kezekte osy jyldyń 29 tamyzynda Astanada ótken «Iаdrolyq qarýsyz álem qurý» atty aýqymdy halyqaralyq konferensııaǵa qatysqany úshin Bolgarııa bıliginiń ókiline óziniń úlken rızashylyǵyn bildirdi. «Siz konferensııada birqatar mańyzdy usynys jasadyńyz. Bul usynystaryńyz Memleket basshysy Nursultan Nazarbaevtyń álemdi ıadrolyq qarýdan azat etý bastamalarymen úılesim tabady», – dedi Memlekettik hatshy. Sonymen qatar, G.Ábdiqalyqova elimizdiń negizgi bastamalaryn Bolgarııa tarapy udaıy qoldap kele jatqanyn atap ótti. Memlekettik hatshynyń aıtýynsha, Bolgarııa tarapy Qazaqstannyń DSU-ǵa, BUU Qaýipsizdik Keńesiniń 2017-2018 jyldardaǵy turaqty emes músheligine qabyldanýyna, Astanada EKSPO-2017 kórmesin ótkizýdi, sondaı-aq, Eýropalyq odaq elderine qysqa merzimdi saparlar úshin vızasyz rejimdi engizýdi qoldaǵan. Odan ári G.Ábdiqalyqova Bolgarııany Qara teńiz óńiri men Balqan túbegindegi Qazaqstannyń negizgi seriktesteriniń biri bolyp tabylatynyn aıta kelip, 2015 jyly elder arasyndaǵy taýar aınalymynyń kólemi 112,9 mln dollardy quraǵanyn jetkizdi. Sondaı-aq, ol «Nurly Jol» ınfraqurylymdyq damý baǵdarlamasynyń iske asyrylý barysy týraly habardar etti. «Aldaǵy 5 jylda baǵdarlamanyń júzege asyrylýyna 24 mlrd dollar bólinip, kóliktik jobalar, onyń ishinde uzyndyǵy 7 myń shaqyrymnan asatyn «Batys Qytaı – Batys Eýropa» avtojoly iske qosylatyn bolady. Biz Bolgarııany osy jobalarǵa qatysýǵa shaqyramyz», – dedi Memlekettik hatshy. Sonymen qatar, kezde­sý sátinde G.Áb­diqalyqova aldaǵy ýaqytta óte­tin EKSPO-2017 halyqaralyq mamandan­­dy- rylǵan kórmesi týraly aıtyp, bolga­rııalyq kompanııalardy bul is-sharanyń aıasynda tehnologııalyq jáne ınfraqury­lymdyq jobalardy júzege asyrýǵa atsalysýǵa sha­qyrdy. Budan bólek, Memlekettik hatshy ekijaqty qarym-qatynastardyń mańyzdy bóligi retinde mádenı-gýmanıtarlyq salaǵa nazar aýdardy. Osy oraıda ol Qazaqstanda bolgar mádenıetin damytý maqsatynda Bolgar etnomádenı birlestigi jumys isteıtinin jetkize otyryp, Sofııa ýnıversıtetinde qazaq tili men Qazaqstannyń tarıhy jáne mádenıetin zerdeleý kabıneti ashylǵany úshin Bolgarııa jaǵyna ystyq yqylasyn tanytty. Kezdesý sońynda G.Ábdiqalyqova Bolgarııa Vıse-prezıdenti M.Popovaǵa eki el arasyndaǵy únqatysýdy nyǵaıtýǵa qosqan úlesi úshin alǵys aıtty. Al M.Popova tilshilerge arnaıy suhbat berý sátinde Qazaqstanda táýelsizdik alǵan kezden bastap halyqtyń jaǵdaıyn jaqsartý baǵytynda qyrýar jumys atqarylǵanyn, Qazaqstan Prezıdenti Nursultan Nazarbaevtyń basshylyǵymen elimizdiń qysqa ýaqyt aralyǵynda mol tabysqa jetip, abyroıy artqanyn atap ótti. Joldybaı BAZAR, «Egemen Qazaqstan»