Merzimi mejelenbegen nysan

Palata otyrystarynda óńir­lerdegi kóptegen máseleler depýtattar saýaldaryna arqaý bo­lyp jatady. Onyń basty sebebi – jergilikti jerdiń bıýdjetinde qarjynyń tapshy bolýy. Ha­lyq qalaýlylarynyń óńir­lik máselelerdi kóldeneń tar­typ jatatyny da sondyqtan. Tómen­degi depýtattyq saýalǵa Qara­ǵan­dy qalasynda konsert za­lyn salý máselesi arqaý bolǵan edi. Májilis depýtaty Daýylbaı Qusaıynov bastaǵan bir top depýtat Premer-Mınıstr K.Mási­mov­tiń atyna joldaǵan saýa­lyn­da Qaraǵandy qalasynda Dostyq zaly bar 1500 oryndyq konsert zalyn salý qajettigine nazar aýdartady. Atalǵan ǵımarattyń qajettiligi etnostardyń ádet-ǵu­ryptaryn, dástúrleri men máde­nıetin jańǵyrtýǵa múmkindik bererimen túsindiriledi. Qazirgi tańda munda 70-ten astam etno­mádenı birlestikter jumys isteıtini belgili. Olar ózderiniń ult­tyq mádenıeti men ana tilin damytýda. Sondaı-aq jarty mıllıon turǵyny bar oblys or­ta­lyǵynda álemdik dárejedegi má­denıet pen óner qaıratkerleriniń qatysýymen aýqymdy sharalar ótkizetin konsert zalynyń ýaqyt talabyna saı qajettilikke aı­nalǵany anyq. Atalǵan nysan qurylysynyń tehnıkalyq-ekonomıkalyq negizdemesi aıqyndalyp, joba-smetalyq qujattary jasalǵany da belgili bolyp otyr. Sonymen qatar, sanıtarlyq-epıdemıolo­gııa­lyq, ekologııalyq jáne memlekettik órt baqylaý mekemele­riniń tıisti qorytyndylary da alynǵan. Tipti, qurylysqa qa­jet­ti jer ýchaskesi men ınjener­l­ik-kárizdik júıeleri de daıyn kórinedi. Joba-smetalyq qujat­tar­ǵa jasalǵan memlekettik saraptama qorytyndysy boıynsha joba quny 4 mıllıard 342 mıllıon teńgege baǵalanypty. О́tken jyldyń 10 qańtarynda Premer-Mınıstr Kárim Másimovtiń Qa­raǵandy oblysyna jasaǵan ju­mys sapary barysynda da atal­ǵan másele kóterilgen kórinedi. Kárim Qajymqanuly bergen tap­syrmalarynyń ishinde sol ny­sannyń qurylysy da tilge tıek etilgen. Barlyq qujattary tolyq jınaqtalyp, tıisti sheshimin kú­tip otyrǵan ǵımarat qomaqty qarjyny qajet etetindikten, ony tabýdyń birden-bir joly respýb­lıkalyq bıýdjet qana bolsa kerek. Sondyqtan depýtattar Úki­met basshysynan osy máseleni sheshýge yqpal etýin suraıdy. K.Másimov depýtattarǵa jol­da­ǵan jaýabyn bylaı bastapty: «Qaraǵandy qalasynda 1500 oryndyq konsert zalyn salýǵa res­pýblıkalyq bıýdjetten qara­jat bólýge qatysty sizderdiń saýaldaryńyzdy qarap, mynany habarlaımyn». Ary qaraı Máde­nıet mınıstrliginiń bıýdjettik ótinimi boıynsha 2011-2013 jyl­darǵa arnalǵan respýblıkalyq bıýdjetti qalyptastyrý sheńbe­rinde jobany qarjylandyrý máselesi Respýblıkalyq bıýdjet komıssııasynda qaralǵany baıan­dalady. Respýblıkalyq bıýdjet­tiń shyǵystaryn ońtaılandyrýǵa baılanysty jańa ınvestısııalyq jobalardy iske asyrý keıinge shegerilgen. Sondyqtan da, «2011-2013 jyldarǵa arnalǵan respýb­lıkalyq bıýdjet týraly» zań jo­basynda jáne Úkimettiń 2010 jylǵy 31 tamyzdaǵy №857 qaý­ly­sy jobasynda da kórinis tappaǵan. Depýtattar atalǵan nysandy salýdy respýblıkalyq bıýdjet esebinen 2011 jyly 1 mıllıard teńgemen bastap, úsh jyl ishinde bitirýdi usynǵan. Premer-Mı­nıstr­diń jaýabynda jańa ın­vestısııalyq jobalardy iske asyrý neǵurlym keıinirek merzimge qaldyryldy delinedi. Alaı­da, ol merzimniń qanshaǵa sozylary naqty aıtylmaıdy... Asqar TURAPBAIULY.