Múbáraktiń jaqtastary tutqyndalýda

Egıpette korrýpsııaǵa qatysy bar degen kúdikpen burynǵy úsh mınıstr men mıllıarder tutqyndaldy. Eks-prezıdent Hosnı Múbárak ákimshiliginiń sheneýnikteri men iri bıznesmen beısenbi kúni Egıpet prokýratýrasynyń nus­qaýy boıynsha ustaldy. Osylaısha, burynǵy ishki ister mınıstri Habıb ál Adlı, burynǵy týrızm mınıstri Zýhaır Garana, burynǵy turǵyn úı mınıstri Ahmed ál Magrabı jáne bolat quıý salasynyń magnaty Ahmed Ezz qamaýǵa alynyp otyr. Olarǵa memleket qarjylaryn jymqyrdy jáne qyzmet babyn jeke bas­taryna paıdalandy degen aıyptar taǵylǵan. Sonymen birge eldegi tóńkeris áli aıaqtala qoıǵan joq. Juma kúni eks-prezıdenttiń qarsylastary Tahrır alańynda Múbáraktiń otstavkaǵa ketýine bir apta tolýyn toılamaqshy. QAZA BOLǴANDAR SANY 25-KE JETKEN Lıvııada ereýilshilerdiń quqyq qorǵaý or­gandary qyz­metkerlerimen qaqtyǵysýy sal­darynan 24 adam qaza tapty dep ha­barlaıdy «Reıter» agenttigi. Lıvııadaǵy úkimetke qarsy ereýilder 15 aqpan kúni bastalyp, eldiń Bengazı, El-Baıda, Trıpolı sııaqty qalalarynda ótken bolatyn. Kóp uzamaı Ben­gazıdegi tártipsizdikterden soń el basshysy Mýammar Kaddafıdi qoldaǵan marsh bolyp ótti. Dál osy sııaqty marshtar memleket basshysy týǵan Trıpolı men Sırte qalalarynda uıym­das­tyryldy. Álemdegi eń iri munaı eksporttaýshy bolyp tabylatyn Lıvııadaǵy ereýilder osy óńirdegi birqatar elderdi qamtyǵan úkimetke qarsy manıfes­tasııa­lardan keıin bastalyp otyr. PARSY ShYǴANAǴY ELDERI BAHREINGE ShET ELDERDIŃ QOL SUǴÝYNA QARSY Parsy shyǵanaǵyndaǵy munaı óndirýshi monarhııalardyń syrtqy saıasat vedomstvolary búginde úkimetke qarsy aksııalar ótip jatqan Bahreın bıligine tolyq qoldaý kór­setetinderin málimdedi. Manamada ótken Parsy shyǵanaǵyndaǵy Arab memleketteri qyzmettestigi keńesiniń tótenshe sessııasynda uıymǵa múshe elderdiń syrtqy ister mınıstrleriniń basshylary uıymnyń qan­daı da bir múshesine qater tóndiretin kez kelgen qaýipke báriniń birlesip qarsy turatyndyqtaryn málimdedi. Aıta ketý kerek, atalǵan uıymǵa Bahreınniń syrtynda Saýd Arabııasy, Birikken Arab Ámirlikteri, Kýveıt, Katar jáne Oman memleketteri múshe bolyp tabylady. Sondaı-aq olar Bahreın isine shet el memleketteriniń qol suǵýyna da qarsylyq bildirýde. Uıym músheleri ondaı áreketti Parsy shyǵanaǵyndaǵy búkil arab elderiniń qaýipsizdigi men turaqtylyǵyna nuqsan keltirý retinde baǵalap otyr. «О́KIMETSIZDIKTIŃ» UZAQTYǴY BOIYNShA REKORD Belgııanyń saıası «ókimetsizdiktiń» uzaqtyǵy jaǵynan álemdik rekord jasaýyna oraı osy eldiń Gent qalasynda ótken halyqtyq merekege 10 myńǵa jýyq adam qatysty, dep habarlaıdy reseılik «Novostı» aqparat agenttigi. Belgııada kezekten tys parlament saılaýy ótip, onyń qorytyndysy boıynsha jańa mınıstrler kabıneti jasaqtalýǵa tıis bolǵanyna 17 aqpanda 249 kún tolsa da, jańa kabınet áli jasaqtalǵan joq. Osylaısha Belgııa saıası daǵdarystyń uzaqqa sozylýy jaǵynan tek Eýropada ǵana emes, búkil dúnıe júzi boıynsha «chempıon» atanyp otyr. Fransýz tilinde jáne nıderland tilinde sóıleıtin partııalar arasynda memlekettik reformalar júrgizý isine qatysty týyndaǵyn alaýyzdyq úkimettik koalısııa qurý jónindegi kelissózderde sheshilmeıtin túıinge aınalyp otyr. PLAGIATQA QOLDAÝ KО́RSETÝ NIETINDE Germanııa kansleri Angela Merkel kandıdattyq dıs­sertasııany kóshirip aldy degen aıyp taǵylǵanyna qara­mastan, qorǵanys mınıstri Karl-Teodor sý Gýttenbergke óziniń qoldaý kórsetetini jóninde ýáde berdi, dep habarlaıdy «Novostı» aqparat agenttigi. Kansler óziniń qoldaý kórsetetinin mınıstrmen bolǵan kezdesý kezinde habarlaǵan. Biraq ol úshin mınıstr ashyq málimdeme jasap, ózgeniń materıalynyń bútindeı bir abzastarynyń silteme jasalmastan qalaısha onyń dıssertasııasyna tap bolǵanyn tú­sin­dirip berýi kerek. Osy máselege baılanysty buqaralyq aq­parat quraldary kótergen daýdyń órship turǵanyna da úsh kún boldy. Mınıstrdiń ózi bolsa, taǵylǵan aıyptar jóninde «tú­siniksiz» degennen ózge eshteńe aıta almaı otyr. QYRǴYZDAR ShYŃǴA PÝTINNIŃ ESIMIN BERMEK Reseı premeri Vladımır Pýtınge taýly shyńnyń biriniń atyn bermek bolǵan qyrǵyz ókimeti isti aıaǵyna deıin jetkizýge bel sheship otyr. 17 aqpan kúni tıisti zań jobasy parlamentte qabyldanyp, úkimet ony bekitip te jiberdi. Depýtattar zań jobasyn tal­qylaýsyz-aq qabyldaǵan kórinedi. Biraq qansha adamnyń qoldap daýys bergeni naqty habarlanǵan joq. Qyrǵyzstandaǵy bir shyńdy Pýtınniń esimimen ataý týraly áńgimeniń bar ekendigi osydan eki aıdaı buryn málim bolǵan. Ideıanyń keń tarap ketkeni sondaı, odan bas tartý endigi jerde Reseı basshylyǵyn syı­lamaǵandyq retinde baǵalanýy múmkin. Sonymen birge, úkimet bekitken qujattyń el zańyna sáıkes kelmeıtini de belgili bolyp otyr. Ol boıynsha geografııalyq nysandarǵa tek qaıtys bolǵan adamdardyń ǵana esimderi beriledi eken. ARALDARǴA UShAQ ÚSTINEN KО́Z SALMAQ Japonııa úkimetiniń bas hatshysy Hokaıdo aralyna baratyn eki kúndik sapary kezinde Kýrıl araldaryn aspannan bir qarap ótpek nıette. Tokıonyń pikirinshe, daýly aýmaq bolyp sanalatyn araldarǵa japon sheneýniginiń barýy Reseı basshysynyń osynyń aldynda jasaǵan saparyna jaýap retinde bolmaq. Sapar barysynda Japonııa mınıstrler kabınetiniń bas hatshysy Iýkıo Edanonyń Kýrıl araldary tizbeginiń ońtústik bóliginiń turǵyndarymen áńgime ótkizbek te oıy bar kórinedi. Soltústik aýmaqtar máselesi, ol tek osy araldardyń burynǵy turǵyndarynyń ǵana pro­blemasy emes, sonymen qatar, ol búkil japon halqynyń pro­blemasy, sondyqtan men japon jurtshylyǵynyń osy máseleni túsiný deńgeıin arttyra túskim keledi, dep málimdegen Edano Tokıoda ótken baspasóz máslıhaty barysynda. Internet materıaldary boıynsha ázirlendi.