Eski úıler de eskeriledi

Osydan 70-80 jyl buryn salynǵan eski úılerden Semeı de kende emes. Áýezov dańǵylyn­da­ǵy ábden tozyǵy jetken sondaı úıdiń biri qysqy qatty aıazda adam turǵysyz jaǵdaıǵa jetip, qatyp qaldy. Sol apatty jaǵdaı munda eki-úsh aptaǵa sozyldy. Jumysqa jańa kirisken qala ákimi Aıbek Kárimov sol shaqta kúndiz-túni osy aradan tabyldy dese de bolady. Aqyr sońynda álgi eski úıge jylý berilip, onda­ǵy turǵyndar bir jasap qaldy. Biraq munymen bar sharýa sheshildi deýge bolmaıdy. О́ıtkeni, eskiniń aty eski. Mundaı úılerde erteń taǵy da apatty jaǵdaıdyń oryn almasyna eshkim kepildik bere almaıdy. Jýyrda osy 41-shi úıdiń turǵyndarymen kezikken oblys basshysy Berdibek Saparbaev mundaı jaǵdaıdan shyǵýdyń bir ǵana joly bar ekendigin aıt­ty. Iаǵnı, respýblıka Úkimetiniń endi qabyldanǵaly jatqan baǵ­dar­lamasynda kóp qabatty eski úılerdi jóndeýden ótkizý maqsa­ty­men ıgi shara qarastyrylyp otyrǵan kórinedi. Ázirshe osy baǵdarlama boı­yn­sha elimizdiń eki qalasynda tá­jirıbe jumysy júrgiziletin bolsa, sonyń biri Semeı eken. Eki qa­la­da kóp qabatty on úı arnaıy saraptamadan ótkizilmek. Sonsoń álgi saraptama negizinde memleket tarapynan tıisinshe qarajat bólinbek. Barlyq qarajattyń 70 paıyzyn memleket ózi kóterip almaq. Qalǵan shyǵyn turǵyndar­dyń esebinen jabylmaq. О́kinishke qaraı, osy kezdesýde qaısybir turǵyndar bul úıde negizinen zeınetkerler turatyn­dy­ǵyn aıtyp, ózderi úshin álgi qalǵan qarajatty tabýdyń ózi kúsh­ke túsetindigin málimdep jat­ty. Bul endi artyq talap pa deımiz. О́ıtkeni, damyǵan elderdiń ózinde eshkim de barlyq mindetti memlekettiń moınyna ilip otyr­ǵan joq qoı. Oblys basshysy aıtqandaı, onda basqa amalyn qarastyrý kerek. Múmkin osyn­daı úılerdiń astyńǵy qabat­tary­na ornalasqan túrli mazmundaǵy saýda núkteleriniń ıeleri kómek­ke keler. Turǵyndardyń basym bóligi qalaı bolǵanda da Úki­mettiń bul ońdy qadamyn qup­taıtyndyǵyn bildirip jatty. Shyndyǵynda úı máselesindegi tyǵyryqtan shyǵýdyń bir joly osy bolar. Dáýlet SEISENULY. Semeı.