Biri jaqsy baǵalansa, ekinshisi súrindi

Keshe Ortalyq saılaý komıs­sııa­synda Qazaqstan Respýblıkasy prezıdenttigine kandıdattyń memlekettik tildi erkin meńger­gen­di­gin anyqtaý jónindegi Lıngvıs­tıka­lyq komıssııanyń otyrysy bo­lyp ótti.  Bul joly atalǵan komıs­sııa­nyń synaǵynan ótý úshin  pre­zıdenttikten úmitkerler Tolybaı Baı­­mýrzın men Mels Eleýsizov keldi. Tańerteńgisin saǵat 11:00-de mem­lekettik tildi qanshalyqty meń­ger­gen­digin kórsetý úshin Tolybaı Baımýrzın Ortalyq saılaý komıs­sııa­syna kelgen bola­tyn.  Prezıdenttikke kandıdat  mem­lekettik tilden sú­rindi. Emtıhan nátıjeleri boıynsha Lın­gvıstıkalyq komıssııa ashyq daýys berý arqyly Tolybaı Nur­dil­da­ulynyń jazýy men máner­lep oqýy­na qanaǵat­tanbaýshylyq bildirip, mem­lekettik tildi meń­ger­megen degen sheshim shyǵardy. Jáne de bul she­shimniń biraýyz­dan qabyldanǵanyn aıta ketýimiz kerek. Qazaqstan Respýblıkasy prezıdenttigine kandıdattyń memlekettik tildi erkin meńgergendigin anyqtaý jó­­nindegi Lıngvıstıka­lyq komıs­sııa­nyń tóraǵa­sy M.Jol­dasbekov kan­dı­dattyń «Perzent paryzy» degen ta­qy­rypta shy­ǵar­ma­synyń saýatsyz ja­zyl­ǵandyǵyn jet­kizdi. Mysaly, or­fografııalyq qa­te­niń sany 24 bolsa, tynys belgilerinen – 23, al stıldik jaǵynan 5 qate ji­bergeni anyq­tal­ǵan. Barlyǵyn qos­­qan kezindegi qate sany 52-ge jetip otyr­. Ekinshi kezeń boı­ynsha Ǵabıt Músirepovtiń shy­ǵar­ma­larynan úzindi keltirý kerek bolsa, onyń ózin de mátindi kibirtiktep, sozbalap oqyǵan.  Úshin­shi kezeń boıynsha «Batyrlyq pen súıis­pen­shilik» taqyrybyn ashý kerek bolsa, prezıdenttikten úmitker ony da asha almaǵan. Lıngvıstıkalyq komıssııa tór­aǵa­sy Myrzataı Joldasbekov pre­zıdenttikke kandıdattyń sóı­lem quraı almaǵandyǵyn ashyq aıtty. Sóıtip, komıssııa músheleri T.Baımýrzın qazaq tilin meńgermegen degen baılamǵa kelgendikterin jetkizdi. Prezıdenttikten taǵy bir úmitker Mels Eleýsizov memlekettik tilden emtıhan tapsyrar al­dynda Ortalyq saılaý komıs­sııasy ǵımaratynda buqara­lyq aqparat quraldary ókilderiniń bir­qatar suraqtaryna jaýap berdi. Úmit­ker saılaýǵa túspes bu­ryn aldymen jaqsylap oılanyp aldym, deı kelip, óziniń dostary­men, tanystarymen aqyl­dasyp alǵandyǵyn jetkizdi. Eko­logııa­lyq problemalardy sheshý jo­lyndaǵy baǵytymnan taımaı­myn, degen Mels Hamzauly prezıdenttik saılaý alańyn óz múm­kindiginshe paıdalaný qajettigin alǵa tartty. Basqalarǵa qaraǵanda jaqsy múmkindigim bar, dep má­lim­degen ol Abaı men Muhtar Áýe­zov shyǵarmalaryn oqyǵandy­ǵymen de bólise ketti. Tipti sóm­kesine salyp ákelgen kitaptaryn da kópshilik naza­ry­na usyndy. Qazaqstan Respýblıkasy prezıdenttigine kandıdattyń memlekettik tildi erkin meńgergendigin anyqtaý jónindegi Lıngvıstıka­lyq komıssııanyń synaǵy­nan sú­rinbeı ótýi de osyndaı úlken daı­yndyqtyń arqasy bolsa kerek. Jazba jumysynyń taqyryby «Qa­zaq­stannyń bolashaǵy» dep atalsa, úmitker ony barynsha jaqsy ashyp kórsete bilgen. Úsh bettik jazba jumysynan 7 qate anyqtalsa, sonyń 2-i orfo­gra­fııalyq jáne 4-i tynys belgilerine qatysty bolǵan. Lıngvıs­tı­kalyq komıssııa tór­aǵasy Myr­zataı Joldasbekov úmit­kerdiń oıy ornyqty, jumysy tolyq aıaqtalǵan degen pikirin bildirdi. Ekinshi tapsyrma boıynsha tý­ǵanyna 80 jyl tolýy toılanyp jatqan  aqıyq aqyn Muqaǵalı Maqataevtyń  óleńin oqyǵan Eleýsizov ózin osy oraıda da jaqsy qyrynan kórsete bilipti. Úshinshi synaq boıynsha «Jer taǵdyry – el taǵdyry» degen taqyrypty da sheber oryndap shyǵypty. Osy­laısha Qazaqstan Respýblıkasy prezıdenttiginen úmitker Mels Eleýsizovtiń memlekettik tildi meńgerýi barysyn synnan ót­kizgen Lıngvıstıkalyq komıssııa oǵan qazaq tilin erkin meńgergen degen sheshim shyǵardy. Qory­tyndy sheshimdi jarııalaı kele Lıngvıstı­kalyq komıssııa tór­aǵa­sy M.Joldasbekov úmitker­diń atyna biraz jyly sózder aıtyp, onyń daıyn­dyǵyna joǵary ba­ǵa­syn berdi. Asqar TURAPBAIULY.