Aqsaqal bastamasy baıandy boldy

Izdengen jeter muratqa deıdi halqymyz. Shyndy­ǵyn­da istiń yńǵaıyn tapqan adamǵa alynbaıtyn qamal joq. Aıtalyq, Abyraly óńi­rin­degi Tańat aýylynyń tur­ǵyny О́mirjan Jaqypov degen jasy jetpisten asyp bara jatqan aqsaqaldyń osy ja­synda týǵan jerine jasap otyrǵan jaqsylyǵy týraly jazǵan bolatynbyz. Sony qysqasha ǵana qaıtalap aı­ta­tyn bolsaq, osy kisiniń bas­tamasymen Tańat aýylynda halqymyzdyń aıtýly aqyny Tóleýjan Ysmaıylovtyń mu­ra­jaıy ashyldy. Aýyl mektebine qamqorlyq tanytyp kele jatqan da О́mekeń. Aýyl aq­sa­qaly aýyl sharýashylyǵyn kóte­rý máselelerinen de syrt qalyp otyrǵan joq. Ol sonyń bárine túrli mazmundaǵy halyq­aralyq granttardy jeńip alyp kele jatqan alǵyrlyǵy arqa­synda qol jetkizýde. Endi, mine, osy óńirden О́me­keńniń jolyn qýǵan jáne bir azamattyń shyqqandyǵyn estip, bilip otyrmyz. Iаǵnı, osyndaǵy Aqbulaq aýylynyń turǵyny Ádilet Tókenov te BUU-nyń Damý baǵdarlamasy boıynsha bir grantty utyp alǵan eken. Halyqtyń qamyn jegen álgi azamat osy baǵdarlamasy aıa­syn­da jarııalanǵan quny 3 myń dollarlyq jobany ákimdik ǵımaratyndaǵy bos turǵan tórt bólmeni aýyl klýby retinde paıdalaný maqsatymen iske kirisip ketedi. Jáne ony jóndep, qatarǵa qosýǵa jergilikti turǵyndar tartylady. Al aýyl klýbyn jabdyq­tap, shtatpen qamtamasyz etýge qalalyq mádenıet bólimi kómekke keldi. Onyń sebebi sol, Abyraly óńiri qalaǵa qa­raıdy. Sonymen, saltanatty jaǵdaıda ashylǵan aýyldaǵy óner ordasy iske qosyldy. Qazir munda dombyra úıir­mesi, boks seksııasy tezdetip ashy­lyp úlgerildi. Alda basqadaı úıirme, seksııalar ashylmaq. – El táýelsizdiginiń 20 jyl­dyǵyna oraı túrli mádenı sha­ralardy qolǵa alyp jatyr­myz, – deıdi klýb basshysy J.Sádýa­qasov. Iske sát deımiz biz de! Dáýlet SEISENULY, Shyǵys Qazaqstan oblysy.