Paralımpıada júldegerleri syılyqty Olımpıada jeńimpazdarymen birdeı alady

Bul týraly búgin QR Mádenıet jáne sport mınıstri Arystanbek Muxamedıuly Astanaǵa oralǵan Paralımpıada quramasyn qarsy alý kezinde tilshilerge bergen suxbatynda málim etti. " Astanada 26 tamyzda Rıo Olımpıadasynyń júldegerlerimen saltanatty kezdesý barysynda Prezıdent Paralımpıada qatysýshylarynyń syıaqy qoryn Olımpıada qatysýshylarynyń deńgeıimen teńestirýdi tapsyrǵan bolatyn. Qazirgi ýaqytta biz mınıstrlikte barlyq qajetti qujattardy, esepterdi, dáleldemelerdi daıyndadyq. Búgin respýblıkalyq bıýdjettik komıssııanyń otyrysy ótedi, sonda bul qujattardy rastaımyz", - dedi mınıstr. Osylaısha, birinshi oryn úshin syıaqy 5 ese - 50 myńnan 250 myń AQSh dollaryna deıin, ekinshi oryn úshin 4,3 ese - 35 myńnan 150 myń AQSh dollaryna deıin, al úshinshi oryn úshin 25 myńnan 100 myńǵa deıin ulǵaıtylatyn bolady. Eske salaıyq, Qazaqstan Respýblıkasy Úkimetiniń qaýlysy boıynsha, júldegerlerge aqshalaı syıaqydan bólek baspana beriledi. Máselen, altyn enshilegen sportshyǵa 3 bólmeli páter, kúmis medal ıegerine 2 bólmeli, úshinshi orynǵa 1 bólmeli páter berilýi tıis. "Paralımpıada oıyndarynan alǵan altyn jáne kúmis medaldar el tarıxynyń alǵashqy júldeleri sanalady. Bul barsha Qazaqstan úshin úlken qýanysh. Eń bastysy, árıne, bul bizdiń sportshylarymyz úshin úlken baqyt. Bizdiń maqsatymyzda jalpy medaldik esepke ený bolmaǵan edi, bizdiń maqsatymyz Rıoǵa 10 joldama utyp, Oıyndarǵa qatysý bolatyn", - dep aǵynan jaryldy A. Muxamedıuly. Rıo-de-Janeıroda ótken XV Jazǵy Paralımpıada oıyndaryna qatysqan Qazaqstan sportshylary elge oraldy. Rıoda ótken Paralımpıada oıyndarynda Qazaqstan quramasy qorjynyna eki medal túsken bolatyn. Otandyq júzýshi Zúlfııa Ǵabıdýllına erkin stılmen 100 metr qashyqtyqqa júzýden álem rekordyn jańartyp, Táýelsiz Qazaqstan úshin Paralımpıadanyń tuńǵysh altyn medalin jeńip alsa, 67 kelige deıingi salmaq dárejesinde óner kórsetken paýerlıfter Raýshan Qoıshybaeva Oıyndardyń kúmis júldegeri atandy.