Sot tarıhynan syr tartqan

Elordada Táýelsizdiktiń 25 jyl­dyǵyna oraı 7-qazanda bolatyn Qazaq­stan Respýblıkasy Sýdıalarynyń VII sezine arnalǵan «Qazaqstandaǵy sot bıligi: ótken tarıhy men qazirgi ke­zeńi» atty kórmeniń saltanatty ashylý rásimi boldy. Ony sóz sóılep ashqan Joǵarǵy Sot Tóraǵasy Qaırat Mámı kórmeniń maqsaty men mańyzyna erekshe toqtaldy. Ol osynda ejelgi dáýirden bas­tap, búgingi kúnge deıingi qazaqstandyq sot júıesiniń damý tarıhyna qatysty barlyq materıaldarmen tanysýǵa bolatynyn jetkizdi. «Qasym hannyń – qasqa joly, Esim han­nyń – eski joly jáne Táýke hannyń «Jeti jarǵysy» kóshpeli Uly Dala elindegi sot ádildiginiń negizin qalady. Atalǵan jarǵylar sol dáýirdegi quqyqtyq qaty­nas­tardy retteýmen qatar, qoǵamdyq kelisimdi saqtaýǵa yqpal etti. Qazaq bıleri sot isterimen birge zań shyǵarýshylyq, at­­qarýshylyq jáne dıplomatııalyq qyz­met­ti de qosa atqaryp kelgen», – dedi Qaı­rat Ábdi­razaquly. Sondaı-aq, kelý­shiler nazaryna bılerdiń qol qoıǵan saıa­sı ákimshilik qujattary, handar men sul­tandarǵa jáne sheteldik bıleýshilerge jaz­ǵan hattary usynylǵandyǵy ortaǵa salyndy. Ekspozısııa «Ejelgi dáýir, orta ǵasyr jáne revolıýsııaǵa deıingi kezeńdegi Qazaqstandaǵy dástúrli quqyq pen sot bıligi», «Qazaqstannyń jańa tarıhı kezeńindegi sot-quqyq júıesi» jáne «Qa­zaqstan Respýblıkasynyń táýelsizdik jyldaryndaǵy sot júıesiniń qalyptasýy men damýy» degen úsh bólimnen turady. Mun­da qoıylǵan eksponattar men fotosýretter, qujattar, materıaldar men beınematerıaldar Joǵarǵy Sot mý­zeıinen, Prezıdent, Tuńǵysh Prezıdent, Ulttyq jáne Ortalyq memlekettik mu­raǵattarynan jınaqtalǵan. Kórmege 210 fotosýret pen 50 eksponat qoıylǵan. Asqar TURAPBAIULY, «Egemen Qazaqstan»