Kınotýyndylar tegin kórsetiledi

Qazaqstan kınematografııasyn óristetip, ulttyq kıno óndirisiniń mádenı ereksheligi men negizin saqtap qalýǵa jáne Qazaqstan men Ortalyq Azııanyń eń úzdik kınotýyndylaryn yntalandyryp, jas talanttardyń kınojobalaryn halyqaralyq deńgeıde nasıhattaýǵa baǵyttalǵan HII «Eýrazııa» halyqaralyq kınofestıvaliniń bıylǵy jańalyǵy kóp. Belgili rejısser Rashıd Nuǵy­ma­novtyń aıtýynsha, kınofestıvaldy «ındýstrııalyq» pishimnen shyǵaryp, meılinshe demokratııalyq, halyqtyq sıpatqa kóshirip, barlyq kınotýyndylardy tegin kórsetpek. Kınogerlerdiń jumysy birneshe atalym boıynsha synǵa túsip, «Tulpar» ulttyq syılyǵymen marapattalady. Sondaı-aq osy fes­tı­val aıasynda «Bala Eýrazııasy» mı­nı-festıvali ótedi. Eń úzdik balalar fılmi sarapqa salynatyn baǵdarlamada báıgeden bi­rinshi oryn alǵan fılmge Abdolla Qar­saqbaev atyndaǵy syılyq usynylyp, ony A.Qarsaqbaevtyń nemeresi, 8-synyp oqýshysy Musa Qar­saqbaev tabystaıdy. О́tken jylǵy dástúrdiń izimen Oraz Ábishev atyndaǵy eń úzdik derekti fılm júldesi de óz ıesin kútedi. Festıval sheńberindegi is-sharalar úsh bólimnen turady. Atap aıtqanda, «Qalaǵa degen mahabbat» bólimindegi kınotýyndylar qoǵamdyq oryndarda kórsetiledi. Al «Kınoǵa degen mahabbat» bóliminde negizgi baıqaý jáne baıqaýdan tys baǵdarlamalar qamtylǵan. «Kásipke degen mahabbat» bólimi boıynsha esimi elge tanymal belgili rejısserlerdiń sheberlik-synyptary, baspasóz más­lıhattary, dóńgelek ústelder, kásibı kezdesýler ótkiziledi. Festıvalda Qazaqstan men Ortalyq Azııadan, alys jáne jaqyn shetelderden 100-den astam fılm kórsetiledi. Tuńǵysh ret túrli janrda túsirilgen arab fılmderi kórermen nazaryna usynylmaq. Álemdi jaqsylyqqa jeteleıtin ádemi ıdeıany arqaý etken rejısserlerdiń áleýmettik taqyryptaǵy týyndylary da qoǵam nazaryn aýdarý úshin maqsatty túrde qatystyrylyp otyr. Kınofestıval 25-30 qyrkúıek ara­lyǵynda Mádenıet jáne sport mı­­nıs­­tr­­liginiń qoldaýymen Almatyda ótedi. Aıgúl AHANBAIQYZY, «Egemen Qazaqstan» ALMATY