Golf oıyndary týraly sóz bola qalsa, esimizge gollıvýdtyq kınolardaǵy kórinister túsetini anyq. Jasyl qyrat ústinde ótetin oıynnyń bul túrin álemge tanymal saıasat, ekonomıka, óner juldyzdarynyń basyn qosatyn aqsúıekterge tán jarys dep qabyldaıtynymyz taǵy bar.
Negizi, golf týrnırleri kásibı sportqa qaraǵanda jarnamasy azdaý ári shekteýli aýdıtorııaǵa arnalǵandaı kóringenimen, álemde bir súıem temir men judyryqtaı dop dese ishken asyn jerge qoıatyndar kóptep sanalady eken. Ári bul oıyn - adamzattyń erteden ermek etken oıyndary sanatynda.
Kári qurlyqtyń jazba shejiresi golf oıynyn shotlandyqtar oılap tapty dep jazyp júrgenimen, ımek taıaq ustap, ıirilgen júndi dop ornyna uryp oınaý salty ǵalamdaǵy barlyq halyqqqa tán sııaqty. Máselen, Rım jaýyngerleri urys arasynda jerdi uńǵyp jiberip, oǵan shaǵyn shar tárizdes domalaq zatty qýalap, salyp oınaıtyn bolǵan. Bul úrdis tek batys jurtynda ǵana emes, shyǵystyqtarǵa da tanymal bolsa kerek. Qytaı jazbalarynda da osyǵan uqsas oıyn túri bolǵany jáne ony bekzadalardyń áýestigi jaıly derekter kezdesedi-mys. Al, bizdiń ejelgi babalarymyzdyń zamanynda da osyǵan uqsas oıyn túri asa tanymal bolǵan eken. Kóktúrikter dáýirinde ishine shóp-shalań toltyrylǵan teri dorbany, uzyn ımek taıaqtar arqyly at ústinde qaqpaqylǵa salyp, qyzý talasatyn oıynnyń bolǵany anyq edi. Uly daladan Eýropaǵa salt atty jaýyngerlerdiń dańqymen ere barǵan osy túrkilik saryn ýaqyt óte kele qazirgi golf oıynynyń shyǵýyna sebep bolǵan shyǵar. Tipti, bul tuspalymyz qazirgi hokkeı túrleriniń túpki izi qaıdan shyǵatynyn da ańdatpaı ma?..
Já, degende qazirgi órkenıetti álem úshin golf týrnırleri eń qazynaly oıyndardyń qatarynda ekeni anyq. Jáne talapqa saı, úlken sporttyq jarystar ótetin golf alańdaryn kez-kelgen elden tabý qıyn. Eldiń aýqattylyǵyn bylaı qoıǵanda, tabıǵı erekshelikterdiń mańyzy zor eken. Qýanyshtysy, Qazaqstandaǵy golftiń damýy oıdaǵydaı jolǵa qoıylǵan. Táýelsizdiktiń alǵashqy jyldarynan-aq otandastarmyzdyń bul oıynǵa degen qyzyǵýshylyǵy oıanyp, jyldan jylǵa artyp keledi. Elimizdi qoıyp, Orta Azııadaǵy teńdesiz golf kesheni Almatyda salyndy. Qazir Alataý baýraıyndaǵy jasyl alańda álemdik deńgeıdegi jarystar ótip turady. Sonyń biri bıyl on ekinshi ret uıymdastyrylyp otyrǵan «Kazakhstan Open» týrnıri.
Almaty qalasyndaǵy «Jaılaý» golf kesheninde jyl saıyn 29 qyrkúıek pen 2 qazan aralyǵynda ótip, dástúrge aınalǵan jarysqa bıyl álemniń ár qıyrynan 132 sportshy qatysyp, baqtaryn synamaqshy. Bul doda «Europen Challenge» jarysynyń bir pushpaǵy sııaqty. Osy jarystan top jarǵan sportshylar «European Tour» jahandyq golf oıyndaryna qatysýǵa joldama alady. Bastalýyna sanaýly kúnder qalǵan jarystyń júlde qory 450 000 eýrony quraıdy. Buǵan deıin ótken tórt jyldyń oıyndarynda jeńimpaz atanǵan sportshylar Almaty tórinde sheberlikterin taǵy bir ret shyńdap, myqtylyǵyn dáleldeıtin bolady.
Aıtpaqshy, jaqynda «Jaılaý» golf klýbynda aldaǵy oıyndardyń uıymdastyrylý barysymen tanystyrý maqsatynda Media day sharasy ótkizilgen bolatyn. Sharada týrnır barysynan aqparat taratýǵa nıetti jýrnalısterdiń basy qosylyp, oıyn tártibi men erekshelikteri týraly erkin áńgime órbidi. Tipti, otyzǵa jýyq almatylyq jýrnalıs golf alańyna shyǵyp, ózara saıysqa da tústi.
Qalmahanbet MUQAMETQALI, Almaty.
