Ekstremızm – búgingi zamannyń zaýaly – A. Ábdirásilqyzy

«Zamanyna qaraı – amaly, deıdi qazaq. Men sońǵy ýaqytta zamanyna qaraı – zaýaly degendi kóp aıtyp júrmin. Sebebi, ár zamannyń ózine qaraı, shynynda da, zaýaly bolady eken. Bizden burynǵylardyń bireýine – ashtyq, bireýine – qýǵyn-súrgin, bireýine – soǵys zaýal bolsa, bizdiń kezeńimizge aqparattyq aǵynnyń, sonyń zardaby bolyp týyndaǵan ekstremızm sekildi keri qubylystarmen, túrli mádenıetsizdiktermen kúresý zaýaly tap kelgen sekildi». Din isteri jáne azamattyq qoǵam mınıstrligine qarasty din isteri komıtetiniń uıytqy bolýymen «Áıelder uıymdarynyń jastar arasynda dinı ekstremızmniń aldyn alýdaǵy róli» taqyrybynda ótken ǵylymı-tájirıbelik konferensııa barysynda atalǵan vedomstvonyń din máseleleri jónindegi ǵylymı-zertteý jáne taldaý ortalyǵynyń dırektory Aınur Ábdirásilqyzy osylaı dedi. Qoǵam qaıratkeri, Baýyrjan Momyshulynyń kelini Zeınep Ahmetova óz oıyn ortaǵa saldy: «Biz árdaıym ózimizdiń izbasarlarymyzǵa, artymyzdaǵa urpaqqa ne bere aldyq degen tóńirekte oılanyp otyrýymyz kerek. Qazaq «Yqtyrmań bolmasa, jelge ókpeleme» deıdi. Demek, jahandanýǵa eń aldymen, ana til arqyly sanaǵa sińetin ulttyq ónege, salt-dástúr, tálim-tárbıe, bir sózben aıtqanda halyq pedagogıkasy arqyly ǵana qarsy tura alamyz. Adamnyń boıyndaǵy ıgi qasıetter, tektilik tek qana ananyń sútimen ǵana keledi. Endeshe, eń aldymen, erteńgi kúni ana, kelin bolatyn, bir bosaǵany attaıtyn qyzdardyń tárbıesine kóńil bólýimiz kerek. Qyzy teksiz, tárbıesiz eldiń irgesinen yrysy ketedi», – dedi Zeınep apa. Al Din isteri jáne azamattyq qoǵam mınıstrligi din ister komıteti tóraǵasynyń orynbasary Ǵabıt Abzalbek te qoǵamda keri aǵymdar tarapynan keleńsizdikter beleń alǵan kezde názik jandylardyń qoǵamdaǵy róli orasan ekenin jetkizdi. «Búginde osy másele tóńireginde birneshe áıelder uıymy jumys istep jatyr. Máselen, qazirgi tańda qoǵamymyzdaǵy rýhanı máselelerdi nazarda ustap júrgen áıelder uıymdary «Dil Iman» dep atalatyn assosıasııany qurdy. Elimizde «Qyz Jibek», «Aıǵanym» sekildi klýbtardyń tetigi iske qosyldy», – dedi Ǵ.Abzalbek. Láıla EDILQYZY