Senbilikte 10 myńnan astam kóshet otyrǵyzyldy

Búgin Astanada 10 myńnan astam kóshet otyrǵyzyldy. Bul «Astana – taza qala!» jalpyqalalyq senbiligi aıasynda uıymdastyryldy. Aǵash otyrǵyzǵandardyń qatarynda Astana qalasy ákimi Áset Isekeshev te bar. «Bárimiz de qalamyzdy jaqsy kóremiz, elordamyzdy tazartýǵa jáne kórkeıtýge úles qosaıyq. Senbilikter óskeleń urpaqty da, eresekterdi de tazalyqqa tárbıeleıdi. Osylaısha, biz qalamyzǵa degen súıispenshiligimizdi jetkizip, patrıottyq tanytamyz», – dedi Astana qalasynyń ákimi Á.Isekeshev. Ákimniń aıtýynsha, qalalyq bılik elordany kógaldandyrý, barlyq aýdandarda jáne shaǵyn aýdandarda gúlbaqtar men saıabaqtar sanyn arttyrýdy óz aldyna mindet etip otyr. Qala ákimdiginiń baspasóz qyzmeti taratqan málimetke súıensek, jalpyqalalyq senbilikke 89 myńnan astam adam, sonyń ishinde kásiporyndar men uıymdardyń 4 myńǵa jýyq qyzmetkeri, 45 joǵary jáne orta arnaıy oqý orny, 133 mektepke deıingi jáne bilim berý mekemesi qatysty, 430 arnaıy tehnıka tartyldy. Senbilikke qatysýshylar «Almaty» aýdanynda Ulttyq mýzeı aýmaǵyna, «Esil» aýdanynda «Han – Shatyr» saýda oıyn-saýyq ortalyǵy aınalasyna, sondaı-aq, Eńbekshiler kóshesinen «Telman» turǵyn alabyna deıin, «Saryarqa» aýdanynda – Sarybulaq ózeniniń jaǵalaýyna aǵash ekti. Sonymen qatar, bilim, densaýlyq saqtaý mekemeleriniń, kásiporyndar men turǵyn úı keshenderiniń aýmaǵyna da aǵash otyrǵyzyldy. Aıtqandaı, Astanada qalany sanıtarlyq tazartý, abattandyrý jáne kógaldandyrý jónindegi kúzgi ekologııalyq aılyq 12 qyrkúıekten bastalǵan bolatyn. Ol 12 qazanǵa deıin jalǵasady. Dınara BITIKOVA