Jambyl oblysynyń elordadaǵy kúnderi aıasynda Ulttyq mýzeıde «Tarıhy tereń Tarazdan taǵzym» atty kórme uıymdastyryldy.
Mádenı jáne rýhanı murasymen baı óńirdiń tarıhy sonaý samanıdter, túrkiler, qarahandar dáýirimen baılanysty. Odan beride qurylǵan qazaq handyǵy naq osy jerde, dálirek aıtqanda Shý men Talas ózenderiniń ańǵaryndaǵy Qozybasy degen jerde tý tikken. Sondyqtan Jambyl oblysynyń jurtqa usynar, kórmege qoıar zattarynyń mol bolýy tarıhı zańdylyq.
Kórmege tek qana oblys kóleminde emes, búkil qazaq mádenıetiniń qundylyǵy ispetti samanıdterdiń kúmis monetalar qazynasy, túrki, qarahan, mońǵol teńgeleriniń toptamalary, 2012 jyly tabylǵan Jetitóbe obasynyń altyn buıymdary, qazaq handyǵynyń qalyptasý kezeńindegi qazaq batyrlarynyń qarý-jaraqtary qoıyldy.
Sondaı-aq, «Ultymyzdyń uly perzentteri» degen bólimde Keńes odaǵynyń batyry Baýyrjan Momyshulynyń, Halyq Qaharmany Qaırat Rysqulbekovtiń, Ǵazız Baıtasovtyń, III dárejeli «Aıbyn» ordeniniń ıegerleri Polat Aıanqulov pen Jaqsybek Baıseıitovtyń jeke zattary men qujattary qoıyldy.
Repressııaǵa ushyraǵan sýretshi L.V.Brıýmmerdiń oblystyq mýzeıge syıǵa tartqan 1000-nan asa sýretteri de kórmege qoıylyp, kórermender qyzyǵýshylyǵyn týǵyzdy.
Kórme Jambyl oblysy ákimdigi men Mádenıet basqarmasynyń qoldaýymen uıymdastyryldy.
Aıgúl SEIILOVA
Foto: Orynbaı BALMURAT
