Rústem Esdáýletov atyndaǵy teatr festıvaliniń júldegerleri anyqtaldy

Rústem Esdáýletov qazaqtyń shyǵarmashylyq tynysy keń, kelesheginen úlken úmit kúttirgen jastarynyń biri bolatyn. Jasyndaı jarqyldaǵan jastyń qol sozǵan armandary qandaı asyl, bıik bolsa, ónerdi órge súıregen is-qımyly da sondaı nyq, naqty edi. Qaryshtap qadam basyp, qalyqtap qanat qaǵyp kele jatyr edi. Jazmyshqa amal bar ma, mańdaıyna kelte ǵumyr jazylypty...  Memlekettik «Daryn» jastar syılyǵynyń laýreaty, kıno jáne teatr akteri, aqyn, rejıs­ser Rústem Esdáýletov atyndaǵy I res­pýb­lıka­lyq Jastar jáne stýdentter fes­tıvali sal­ta­natty túrde tusaýyn kesti. Shyǵys Qazaq­­stan ob­lys­tyq drama teatrynda shy­myl­­­dy­ǵyn túr­gen sharaǵa Astana, Almat­y, Qaraǵan­dy, Kók­she­taý, Semeı syndy qala­lar­­dan bir­qatar teatr ujymdary keldi. Fes­tıval­ǵa qatysý­shy­lar aldymen Rústem Es­dáýletov shyǵar­ma­shy­lyǵyna arnalǵan kórmeni tama­shala­dy. Kórmege rejısserdiń túrli teatr festıval­­derinde qol jetkizgen jetistikteri men mara­pattary, teatr tarlandarymen jáne áriptes­teri­men, sondaı-aq jumys barysynda túsken foto­sýretteri, óleńder jınaǵy men túrli jı­naq­tarǵa engen toptamalary jáne baspasóz betin­degi estelikter qoıylypty. Tuńǵysh ret uıym­dastyrylǵan teatr merekesi úsh kúnge sozyl­dy. Qońyr kúz­degi adam janyn terbeıtin rýhanııat mere­kesiniń ashylý saltanatynda oblys ákimi­niń orynbasary Jaqsylyq Omar qut­tyqtap, rýhtas dosy týraly shynaıy syr shertti. – Rústem týraly kóp aıtýǵa bolady. Ol О́ske­mende qazaq teatrynyń baıraǵyn bıik jel­biretemin dep ter tókti. Osydan biraz ýaqyt buryn óńirimizde ótken respýblıkalyq drama teatrlary festıvalinde Rústem dosy­myzdy eske alýǵa arnalǵan aýqymdy shara uıym­­­dastyr­saq, eldiń barlyq tarapynan teatr ujym­­daryn shaqyrsaq, oǵan jastar teatr­lary qatyssa degen oıymyz búgin júzege asty. О́ıtkeni, ol qazaqtyń ónerdegi jas­tary­nyń bet-beınesi bolyp qalyptasyp, eldiń jadynda da sol bolmysymen qaldy, dedi Jaqsy­lyq Omar. Buǵan qosa, oblys ákiminiń orynbasary festıvaldi dástúrli túrde jyl saıyn uıym­dastyrý kóz­delip otyrǵanyn jetkizdi. Budan keıin R.Esdáýletovtiń ómiri men óneri­nen syr shertken «Bórinama» derekti fılmi kór­setildi. Fılmde qazaqtyń ádebıeti men máde­nıetine talantty ul-qyzdardy syılaǵan irgeli áýlet, aýyldaǵy Orazbaı ákeniń máýeli baǵynda qııaly júırik bolyp ósken armanshyl bala, onyń óz baǵytyn aıqyndaǵan jastyq shaǵy men shyn júırikke tusaý joq ekenin tanytqan sahna men sahna syrtyndaǵy san túrli eren eńbegi baıan­dalady. Kadrda otyz bir jasynda talaı bıik­terdi baǵyndyryp úlger­gen R.Esdáýletovtiń ól­sheý­li ómiri de saǵat tili­men syrtyldap, adam balasy­nyń bul pánı­degi maqsat-muratynyń mánin asha túsedi. Sankt-Peterbýrgte reseılik áıgili teatr tar­lany L.Dodınniń tálimin alǵan Rústemniń sol kez­degi ózi jetekshilik jasaǵan Jambyl atyn­daǵy Shyǵys Qazaqstan oblystyq teatryn Stanı­slav­skıı júıesimen qaıta qurýy da ónerdegi jansebil eńbeginiń bir kórinisin pash etti. Jary Marjan búginde Rústemniń tútinin óshirmeı, artynda qalǵan Oljas, Botagóz, Hanzada, Nurzada esimdi balalaryn tárbıelep otyr. Onyń ómirden erte ozǵan rejısserdiń murasy boıynsha T.Júrgenov atyndaǵy óner akademııasynda kandıdattyq dıssertasııa qorǵaǵanyn aıta ketken lázim. Iаǵnı, R.Esdáýletovtiń murasy izdeýsiz emes. Festıval barysynda Kókshetaý qalasy Aqan seri atyndaǵy mádenıet kolledji­niń «Jas tolqyn» jastar stýdııasy R.Muqanova­nyń «Máńgilik bala beıne», Semeı qalasy M.Tólebaev atyndaǵy mýzyka ýchılıshesiniń «Dáýir» stýdenttik teatry M.Shahanovtyń «Tanagóz», Almaty qalasy «A.I mýzykalyq teatr ortalyǵy» M.Áýezovtiń «Qaragóz», Qaraǵandy qalasy Táttimbet óner kolledjiniń «Q» stýdentter teatry Iran-Ǵaıyptyń «Qor­qyt­tyń kóri», Astana qalasy Qazaq ult­tyq óner ýnıversıtetiniń «Stýdenttik zerthana­sy» I.Saparbaıdyń «Syǵan serenadasy» jáne baǵdarlamadan tys Shyǵys Qazaqstan oblystyq drama teatry Abaıdyń «Atymdy adam qoıǵan soń...» atty oı-tol­ǵanysy arqaý bol­ǵan qoıylymdaryn sahnalady. Belgili teatr synshylary sahnanyń jas býynyna baǵa berdi. Taqyryp tańdaý, eksperımenttik iz­denis, akterlik ansambl, sahnadaǵy qımyl-qoz­ǵalys, rejısserlik sheshim syndy sahnanyń san syryn qamtyǵan syn-eskertpeler keleshek teatr sheberlerine bir jaǵynan tájirıbelik dáris ispetti boldy. Festıvaldiń jabylý saltanatynda aqyn, Memlekettik syılyqtyń laýreaty Ulyqbek Esdáýlet bul teatrdyń Rústemniń ózi jobasyn syzyp, armandap ketken óner ordasy ekenin, adam janyn móldiretetin teatr óneriniń О́skemendegi órleýi Rústemnen bastalatynyn, osy oraıda festıval keleshekte shetelderdiń ujymdary da qatysatyn halyqaralyq shara­ǵa aınalsa degen tilegin aıtty. Sondaı-aq, kópshiliktiń tilegine saı oblystyq teatrǵa Rústem Esdáýletovtiń esimi berilse degen usy­ny­syn jetkizdi. Aıta ketý kerek, bul másele budan buryn jergilikti baspasózde birneshe márte kóterilgen bolatyn. Úsh kúnge sozylǵan festıval qorytyn­dysy boıynsha bas júldeni Astana qalasy­nan kelgen Qazaq ulttyq óner ýnıversıteti­niń «Stýdenttik zerthanasy» jeńip aldy. Bul – I.Saparbaıdyń «Syǵan serenadasyn» qoıǵan Qazaqstannyń eńbek sińirgen qaıratkeri Saılaý Qamıevtiń rejısser retindegi alǵashqy jeńisi eken. Festıvalǵa qatysqan barlyq teatr ujymdary jeke atalymdar boıynsha marapattalyp, qarjylaı syılyqtarǵa ıe boldy. Dýman ANASh, «Egemen Qazaqstan» О́SKEMEN