Kelesi jyly 33 myń páter salynady – Bıshimbaev

Ústimizdegi jyly elimizde 9 mln sharshy metr turǵyn úı paıdalanýǵa beriledi. Bul týraly búgin Úkimet otyrysynda Ulttyq ekonomıka mınıstri Qýandyq Bıshimbaev málim etti. «Ústimizdegi jyly qarjylandyrýdyń barylyq kózderi esebinen 830 mlrd teńgege shamamen 9 mln sharshy metr turǵyn úı salyp, paıdalanýǵa berý josparlanyp otyr. Bunyń barlyǵy, eń aldymen «Nurly jol» baǵdarlamasynyń jáne Úkimet pen Ulttyq banktiń daǵdarysqa qarsy qabyldaǵan sharalarynyń arqasynda múmkin bolyp otyr. «Nurly jol» memlekettik baǵdarlamasy aıasynda 2020 jylǵa qaraı 4,5 mln sharshy metr turǵyn úı salyp, paıdalanýǵa berý kózdelgen», dedi mınıstr. Onyń aıtýynsha, bıyl turǵyn úı qurylysy men ınfraqurylymdy damytýǵa 442,5 mlrd teńge bólingen. Onyń ishinde Ulttyq qordan 423,9 mlrd jáne respýblıkalyq bıýdjetten 18,6 mlrd teńge qarastyrylyp otyr. Bul qarajattyń ishinde jalǵa beriletin turǵyn úı qurylysyna 82,8 mlrd teńge jumsalady. Sondaı-aq jalǵa beriletin kommersııalyq turǵyn úı qurylysyna 97 mlrd teńge kózdelgen. Bul qarjyǵa 2017 jyly 498,2 myń sharshy metr (10 600 páter) salynady. Budan bólek, ınjenerlik-kommýnıkasııa ınfraqurylymyn tartýǵa 110,9 mlrd teńge, Qazaqstannyń Turǵyn-úı qurylys jınaq bankiniń salymshylaryna nesıe berýge 22 mlrd teńge bólinedi. «Nátıjesinde, memleket qarajaty esebinen 2015 jyly jáne 2016 jyldyń ótken kezeńi ishinde 22,6 myń otbasy jáne jyldyń sońyna deıin qosymsha 6,8 myń otbasy baspanamen qamtamasyz etiledi. 2017 jyly 33 myń páter salynady», dedi Q.Bıshimbaev. Egemen-aqparat