Almatydaǵy «Altyn Orda» bazarynyń janyndaǵy joldy keńeıtý jumystary 2017 jyldyń maýsym aıynda bastalady. Oǵan deıin jol boıyndaǵy 25 saýda núktesi alynyp tastalady. Qazir «Barlyq» bazaryndaǵy saýda oryndaryn buzý jumystary bastalyp ketti. Bul týraly Almaty qalalyq Jolaýshylar kóligi jáne avtokólik joldary basqarmasynyń basshysy Maqsut Isaqovqa silteme jasaǵan Tengrinews.kz habarlady.
Onyń aıtýyna qaraǵanda, bul másele 15 qyrkúıek kúni vıse-premer Asqar Mamınniń qatysýymen talqylanǵan. Otyrysta Almaty-Bishkek trassasynyń «Altyn Orda» janyndaǵy bóligin jańartýdyń jobasyn daıyndaý jáne shyǵynyn esepteý tapsyrylǵan.
Endi joldyń qaı bóligi qaıta jasalady jáne qalaı ózgeredi degen másele týraly.
- Qazirgi esep boıynsha uzyndyǵy 3,5 kılometr jol keńeıtiledi.
- Ol – Qalqaman shaǵyn aýdany tusyndaǵy keri aınalý úzigi men «Asyl Arman» turǵyn úı kesheni aralyǵy.
- Jol 10 jolaqty (10 kólik sııatyndaı) – ár baǵytta bes-bes jolaqty bolyp salynady. Onyń úsh jolaǵy – tranzıttik, ıaǵnı týra ótetin kólikterge arnalady. Bir jolaǵy ary-beri burylatyn sol mańaıdyń kólikteri úshin bolsa, taǵy bir jolaq qoǵamdyq kólikke arnap salynady. Bul jolaq «baraholka» mańyndaǵy sııaqty basqa kólikter kire almaıtyndaı etip bólinedi.
- Joldyń bul bóliginde úsh jerden keri aınalý úzigi qaldyrylady. Olardyń bireýi Qalqamannyń tusynda, ekeýi «Asyl Arman» jaqta bolady.
- «Altyn Orda» bazary sol ornynda qalady.
- Joldy jańartý jumystary 2017 jyldyń maýsymynda bastalady.
- Jasalyp bolǵannan keıin jańartylǵan jol bóligi Almaty qalasynyń qaramaǵyna ótedi.
- Kelesi jylǵy respýblıkalyq bıýdjetten joldy jańartýdyń jobalyq-smetalyq qujattamasyn daıyndaýǵa 150 mıllıon teńge bólý qarastyrylǵan.
- «Altyn Orda» janyndaǵy 3,5 kılometrlik joldy keńeıtýge barlyǵy 10 mıllıard teńge qajet.
