Premer-mınıstr kásipkerlikti qoldaý máselesin baqylaýǵa alýdy tapsyrdy

Qazaqstan Úkimetiniń basshysy Baqytjan Saǵyntaev óziniń orynbasarlaryna kásipkerlikti qoldaý máselesin baqylaýǵa alýdy tapsyrdy dep habarlaıdy prime-minister.kz. Otyrysta memlekettiń jáne bıznestiń syndarly jumysynyń arqasynda ákimshilik kedergiler men ruqsat berý úderisteri máseleleri endi kóterilmeıtini aıtyldy. Qazir birinshi kezekke otandyq taýar óndirýshilerdi qoldaý, salyqtyq ákimshilendirý jáne qarjy kózderiniń qoljetimdiligi máseleleri shyǵady. Osyǵan baılanysty Premer-Mınıstr birqatar tapsyrmalar berdi. «Salyqtar, nesıeleý boıynsha kóptegen suraqtar bar. О́tken aptada biz «Atameken» basqarmasymen, ekinshi deńgeıli banktermen kezdestik, bárinde nesıeleý boıynsha suraqtar bar, barlyǵy bizde jumys jasap jatqan memlekettik baǵdarlamalardy qoldaıdy. Memleket qosymsha aqsha bólip otyr, alaıda «Agrobıznes-2020» jáne «Bıznestiń jol kartasy-2020» baǵdarlamasyn qaıta qaraý mindeti tur», – degen tapsyrma berdi Premer-Mınıstr óziniń orynbasarlary A. Mamın men I. Tasmaǵambetovke. Premer-Mınıstr nesıeleýdiń qoljetimdiligi máselesine toqtaldy. Ol Úkimet Ulttyq bankpen birge nesıe resýrstarynyń qoljetimdiligi máselesin jaqsartý boıynsha sharalar ázirlenip jatqanyn aıtyp ótti. Osyǵan baılanysty Ulttyq ekonomıka mınıstrligine Ulttyq bankpen birge «Bıznestiń jol kartasyna-2020» ózgerister engizý máselesin pysyqtaý qajet. Atalǵan tapsyrmalardyń oryndalý nátıjesin B. Saǵyntaev 10 kúnnen keıin tyńdaıtyn bolady.