Kásipqoı boksshynyń kesheni

keler jyly paıdalanýǵa beriledi Áıgili boksshy Gennadıı Golovkın Qaraǵan­dynyń irgesindegi Maıqudyq eldi mekeninde salynyp jatqan dene shynyqtyrý-saýyqtyrý kesheniniń qurylysymen tanysty. Sátin salyp, jańa sporttyq nysan tolyǵymen salynyp bitkende, ol chempıonnyń esimimen atalatyn bolady. Qurylysy aıaqtalýǵa taıaǵan ǵımarat ishin aralap kórgen álem chempıony atqarylǵan jumystarǵa rıza ekendigin bildirdi. Boks zalyn kórgen Golovkın onyń keńdigin atap ótip, eger de jaqsylap jabdyqtasa, bul jerden bolashaqta myqty boksshylardyń sandaǵan býynyn ósirip shyǵarýǵa bolatynyn aıtty. «Boks damyp keledi. Qazir zalda rıng qana bolý kerek degen túsinik joq. Shved qabyrǵasyn, pnevmatıka, zamanaýı qural-saıman, qabyrǵalarǵa jastyqshalar, kergish qoıý kerek. Boks degen rıngke shyǵyp alyp qur sekirý emes. Bul degenińiz – evolıýsııalyq jolmen únemi damý. Sporttyq qural-saıman jyldamdyq pen kúsh-qaıratty arttyrýǵa qajet», – dedi chempıon. Golovkın sondaı-aq,balalardy kósheniń yqpalynan aman saqtap, sport zaldaryna tartý isine mán berý kerektigin tilge tıek etti. Jańa sport kesheni paıdalanýǵa berilgende, balalar oǵan tegin kirip, aqysyz jattyǵýǵa múmkindik alsa degen tilek aıtty chempıon. «Kezinde biz jattyǵýǵa barý úshin qalanyń ana shetinen myna shetine deıin avtobýspen saǵattap júretinbiz, – dep jastyq shaǵyn eske aldy Golovkın. – Jattyǵýdan keshke shyqqanda, avtobýstarǵa syımaı qalatyn kezderimiz de bolatyn. Al mine qalsań, kóliktiń ishi azynap turýshy edi. Endi Maıqudyqtyń balaqaılary biz bastan keshken qıyndyqtardy kórmeıtin bolady. Bul – Maıqudyq úshin úlken jetistik». Golovkınmen birge jańa ǵımarat quryly­synda bolǵan oblys ákiminiń birinshi orynbasary Asylbek Dúısebaev keshen salynyp bitken soń onyń esigi balalar úshin qashanda ashyq jáne kirý tegin bolatynyna sendirdi. «Bul Maıqudyqta kópten beri salynǵan alǵashqy nysan. Keshen kelesi jyly paıdalanýǵa beriledi. Bul jerde balalarǵa qajetti jaǵdaıdyń bári jasalady. Eń bastysy, biz sapaǵa mán beretin bolamyz», – dedi Asylbek Dúısebaev. Qazirgi tańda keshen ishindegi 25 metrlik basseınniń qurylysy tolyqtaı aıaqtalǵan. Ishki árleý-óńdeý jumystary josparǵa saı, irkilissiz júrgizilip jatyr. Qaırat ÁBILDINOV, «Egemen Qazaqstan» QARAǴANDY