Syrt alańdaǵy alǵashqy jeńis

Qurlyqtyq hokkeı lıgasynda baq synaıtyn «Barystyń» baby endi kele bastaǵandaı. О́tken seısenbide Sochıde jergilikti «Sochımen» kezdesken astanalyqtar 6:3 esebimen basym tústi. Bul – «Barystyń» sońǵy tórt oıyndaǵy úshinshi jeńisi. «Sochı» oıynshylary kezdesýdi óte qarqyndy bastady. Nátıjesinde 6-mınýtta Ilıa Krıkýnovtyń kómegimen esep ashty. Arada 6 mınýt ótkende, «Barys» sapynan Dmıtrıı Grens mergendigimen kózge túsip, tarazy basyn teńestirdi. Alaıda, sochılikter bar bolǵany 30 sekýndtan keıin taǵy da alǵa shyqty. Bul joly nátıjeli soqqyny Igor Zaharov jasady. Bizdiń jigitter 18-mınýtta Naıdjel Doýstyń arqasynda esepti qaıtadan teńge keltirdi. Ekinshi kezeńde «Barys» oıynshylary qorǵanys pen shabýylda saýatty oınap, esepti eseleı berdi. Atap aıtqanda, 22-mınýtta Martın Sen-Per, al 33-mınýtta Vladımır Markelov mergendikterimen kózge tústi. Osy qarqynyn úshinshi kezeńde de joǵaltpaǵan Edýard Zankovestiń shákirtteri 46-mınýtta taǵy eki shaıba soqty. Erekshe atap ótetin jaıt, bul goldar nebári 24 sekýndtyń ishinde soǵyldy. Aldymen Kevın Dallmen erlese, artynsha tabloǵa Nursultan Belgibaevtyń esimi jazyldy. «Barystyń» bul basymdyǵyna «Sochı» hokkeıshileri 49-mınýtta Andre Petersson soqqan jalǵyz shaıbamen jaýap berdi. Qalǵan ýaqytta esep ózgermeı, elordalyq­tar osy maýsymdaǵy tórtinshi jáne syrt alańdaǵy birinshi jeńisterine qol jet­kizdi. Ázirge 11 oıynnan 13 upaı jıǵan «Barys» Shyǵys konferensııasynda 13-orynda tur. Astanalyqtar kelesi kezdesýin búgin Nıjnıı Novgorodta jergilikti «Torpedomen» ótkizedi. Elaman QOŃYR