О́renderimiz jiger tanyta almaı tur

Qyrkúıektiń 21-i kúni Reseı Federasııasynyń Hanty-Mansı avtonomııaly respýblıkasynyń ortalyǵy – Iýgra qalasynda resmı túrde ashylǵan shahmattan álemniń 14, 16 jáne 18 jasqa deıingi jasóspirimderi arasyndaǵy chempıo­natynda qazirge deıin 5 raýndtyń oıyndary oınalyp bitti. Jarysta kútkendegideı, tórtinshi týrdan bastap kúshti qarsylastar bir-birlerimen betpe-bet kezdese bastady. Bul olardyń arasynda negizinde kimniń basty júldelerge talasatyndaryn da birshama baıqatyp qoıdy. Jahandyq jarystyń úsh kategorııadaǵy top bastaýshylary qatarynan biz Reseı, Qytaı, Polsha, Armenııa, Grekııa, Avstrııa, Úndistan, Italııa, Nıderland, Iran jáne Grýzııa elderiniń shahmatshylaryn kórip otyrmyz. О́kinishke qaraı, bul sapta Qazaqstannyń birde-bir sportshysy joq. Bizdiń órenderimiz kósh bastaǵan negizgi top oıynshylarynan upaı qory jaǵynan qazirdiń ózinde biraz qalyp qoıdy. Al 4-raýndtyń 18 jasqa deıingilerdiń kezdesýlerinde biz úshin naǵyz prınsıpti match taıaý­da ǵana Reseı quramasy sapyna aýysyp ketken burynǵy otandasymyz Bıbisara Asaýbaeva (sýrette) men Dılıara Albekovanyń arasynda oınaldy. Bul kezdesýde jasy áldeqaıda kishi Bıbisara óziniń burynǵy jerles ápkesin utyp ketti. Jalpy, bizdiń shahmatshylar týrnırde ala-qula oıyn kórsetip keledi. Olardyń arasyndaǵy úzdik degenderdiń ózi bir kezdesý­de utsa, kelesisinde sátsizdikke ushyrap qalyp jatyr. Ázirge jeńisti jeńis­ke jalǵastyryp kele jatqan esh­qaı­sysy joq. Máselen, saıys­ty aı­tarlyqtaı jaqsy bastaǵan 14 jasar Ramazan Jalmahanov 4-5 raýndtarda ushyrasqan avstrııalyq Felıks Blogbergerden de, belorýs Vıacheslav Zarýbıskııden de utyldy. Al 18 jasqa deıingilerdiń óz ishimizdegi lıderi Janat Saıyn 4-týrda armıan Manvel Petrosıannan jeńilse, kelesi týrda grýzın Iraklıı Ahvledıanıden sonyń esesin qaı­tar­ǵandaı boldy. Sol sııaqty 16 jas­qa deıingilerdiń arasynda biz­den 1-týrdan sýyrylyp alǵa shyq­qan Jandos Aǵmanov 4-raýndta reseılik Oleksandr Trıapıshkomen kezdeskende, attan aýyp túskendeı kúı keshti. Onymen qatarlasa shapqan Denıs Mahnev osy tusta kerekti upaılar jınaýy, sonyń ishinde Jandospen oıyndy teń aıaqtaýy arqasynda onyń aldyna túsip ketti. Búginge deıin qazaqstandyqtar kóshinde týrnırdegi áýelgi pozısııasyn kóp joǵalta qoımaǵan Janat Saıyn bolyp otyr. Ol 10-orynda keledi. Sodan keıingi myqtymyz – 14 jasar Ásel Serikbaı esepti kezeńde aldymen reseılik Ekaterına Golsevaǵa ese jiberse, sońynan belgııalyq Darııa Vandıýfıýsti súrindirdi. Osynyń ózi onyń burynǵy 6-ornynan syrǵyp, 15-basqyshqa bir-aq túsýine jetip jatty. Al budan keıingilerdiń dúrkiregen dúrmekke ilesip kele jatqandary tek úshinshi ondyqtyń aýmaǵynan ǵana qol bulǵaı alady. Chempıonat shveısar júıesimen ótkizilýde. Sondyqtan ol 11 raýndtan turady. Birinshilikke qatysýshylar burnaǵy kúni úzilis aldy. Al keshe keshke 6-týrdyń oıyndary oınaldy. Demek, osydan keıin órmektiń júzi aýǵaly tur. Jarys sol qarqynymen 3 qazanǵa deıin baryp, tynys tabady. Erteńine chempıonattyń jabylý saltanaty ótedi. Damır QOJAMQUL