«Densaýlyq» poıyzy Aqtóbege attandy

Aqtóbe oblysynyń shalǵaıdaǵy eldi mekenderiniń turǵyndaryna, temirjolshylaryna jáne olardyń otbasy múshelerine endi dıagnostıkalyq tekserilý jáne medısınalyq kómek alý úshin respýblıkamyzdyń iri qalalaryna barmaı-aq, tolyq medısınalyq tekseristen ótýge jáne jetekshi mamandardyń bilikti keńesin alýǵa múmkindik bar. Aqtóbe oblysynyń alystaǵy stansalaryna elimiz Táýelsizdiginiń 25 jyldyǵyna arnalǵan respýblıkalyq aksııa aıasynda «Densaýlyq» keńestik-dıagnostıkalyq poıyzy jol tartady. «Densaýlyq» poıyzy oblystyń 6 stansasyna qyzmet kórsetýdi josparlap otyr. 29 qyrkúıek kúni Alǵa stansasynan bastap, odan ári keste boıynsha 4-9 qazan aralyǵynda Muǵaljar stansasyna, 10-13 qazan aralyǵynda Shalqar stansasyna, 14-19 qazan aralyǵynda Temir stansasyna, 20-24 qazan aralyǵynda Hromtaý stansasyna jáne 25-28 qazan aralyǵynda Aqtóbe stansasyna medısınalyq qyzmet kórsetedi. «Jyljymaly emhana» dep atalyp ketken medısınalyq poıyzdyń vagondarynda dárigerlerdiń kabınetteri, dıagnostıkalyq korpýs, tirkeý bólimi, tamaqtaný jáne dem­alý bloktary  ornalasqan. Poıyzda ÝDZ-dıagnostıkalaý, tańý, prosedýralyq kabınetter jáne shaǵyn hırýrgııalyq operasııalar jasaıtyn operasııalyq blok qarastyrylǵan. Barlyq kabınetter tolyqtaı kompıýterlengen. Dıagnostıkalyq zertteýlerdiń jáne tapsyrylǵan taldamanyń nátıjesi de kóp kúttirmeıdi. 2016 jyldyń basynan «Salamatty Qazaq­stan», «Járdem» jáne «Densaýlyq» keńestik-dıagnostıkalyq poıyzdarymen 133 kún ishinde Qaraǵandy, Aqmola, Soltústik Qazaqstan, Qostanaı, Pavlodar, Batys Qazaqstan, Atyraý, Mańǵystaý, Shyǵys Qazaqstan, Almaty, Qyzylorda, Ońtústik Qazaqstan jáne Jambyl oblystarynyń 154 stansasynyń 35 520 turǵyny tekserildi, olardyń 5 422-si balalar. Dárigerlerge kelýshilerdiń jalpy sany 274 285 adamdy qurady. 183 536 dıagnostıkalyq prosedýra, 1 004 ambýlatorlyq operasııa jasaldy. Mammologta 5 397 áıel adam qaraldy. 10 219 turǵynǵa stomatologııalyq kómek kórsetildi. Jumys nátıjesinde poıyz mamandary 86 292 aýrý túrin tirkedi, olardyń 8 446-sy balalarda. 1 168 qaterli isik anyqtaldy. Shalǵaıdaǵy eldi meken turǵyndary osyndaı kómek kórsetilgenine alǵys aıtyp, rızashylyqtaryn bildirýde. Raýan QAIDAR, «Egemen Qazaqstan»