Ońtústik Qazaqstan oblysynyń Maqtaaral aýdanynda 330 myń halyq turady. Olar negizinen maqta óndirýmen aınalysady. Aýdan respýblıkada óndiriletin maqtanyń 70 paıyzyna jýyǵyn beredi. Aýdanda 136 myń gektar sýarmaly jerlerdiń 83 myńyna maqta egilip, jyl saıyn mol ónim alyp kelgen.
Alaıda, sońǵy jyldary aýdandaǵy sýarmaly jerlerdi aǵyn sýmen qamtamasyz etý úlken problemaǵa aınalýda. Aǵyn sý Qyrǵyz, О́zbek, Tájik memleketteri arqyly ótetin Syrdarııa ózeninen alynady. Maqtaaral aýdanynyń úshten eki bóligin aǵyn sýmen qamtamasyz etetin «Dostyq» kanaly О́zbekstan aýmaǵynan bastaý alady jáne ol sol eldiń menshiginde.
Bıylǵy jyl aýdan boıynsha qajetti 1mlrd 116 mln tekshe metr aǵyn sýdyń 980 mıllıony ǵana nemese 87,8 paıyzy alyndy. Onyń ózi de keshigip, vegetasııanyń sońyna qaraı berildi. Al aǵyn sýdyń eń kerek kezi shilde men tamyz aıynyń basynda «Dostyq» kanalynan qajetti 310 mln tekshe metr sýdyń 93 mıllıony ǵana berilip, egilgen daqyldar, ásirese, maqta shildedegi 45-47 gradýs aptap ystyqta sýarylmaı, shólden zardap shekti, 1500 ga jer múlde sýarylmaı qaldy. Árıne, bul jaǵdaıda maqtanyń ónimdiligi, sorty, salmaǵy tómendeıdi. Sharýalardyń ala jazdaı aptap ystyqta etken eńbekteriniń qaıtarymy tómen bolady. Mundaı jaǵdaılar Syrdarııa basseıninde ornalasqan memleketterdiń úkimetteri arasynda ózen sýyn tıimdi paıdalaný týraly aldyn ala kelispeýshiliktiń jáne týyndaǵan problemalardyń úkimetaralyq deńgeılerde aldyn ala ýaqtyly sheshilmeýiniń saldarynan bolyp otyr. Osyǵan saılaýshylar tamyz aıynyń sońynda bolǵan kezdesýlerde ózderiniń narazylyqtaryn aıta kele, aldaǵy kezde osy máseleniń oń sheshilýine yqpal etýdi menen tilek etken bolatyn.
Mine, osy tilekti eskere kele, Úkimet basshysy Baqytjan Saǵyntaevqa tómendegideı ótinish bildirilgen depýtattyq saýal joldadym:
- Ońtústik Qazaqstan jáne Qyzylorda oblystaryn aǵyn sýmen turaqty qamtamasyz etý úshin shekaralyq Syrdarııa ózeniniń sýyn tıimdi paıdalaný týraly tıisti memleketterdiń úkimetterimen aldyn ala jyl basynan naqty sharalar qarastyryp, onyń oryndalýyn qatań baqylaýǵa alýdy;
- Ońtústik Qazaqstan oblysy Maqtaaral aýdanyn aǵyn sýmen qamtamasyz etetin О́zbekstan menshigindegi «Dostyq» kanaly arqyly beriletin aǵyn sý kólemin naqtylap, aldyn ala úkimetaralyq kelisimshart jasaý týraly tapsyrma berýińizdi ótinemin.
