Kádimgi túbirtekterdi oınatyp avtokólik utyp alýǵa bolady

 Endi Qazaqstannyń kez kelgen azamaty kádimgi taýar satyp alǵan kezde beriletin túbirtektermen lotereıaǵa qatysyp, baǵaly júldeler utyp alýyna bolady. Qazannyń 1-inen «Túbirtekti talap etip júlde utyp al» atty aksııa bastalady. Onyń maqsaty azamattardyń tovar, jumys jáne qyzmet tutynýshysy retindegi óz múddelerin qorǵaý boıynsha quqyqtyq mádenıetin qalyptastyrý. Memlekettik kirister komıtetiniń resmı ókili Muratbaı Jumanbaıdyń aıtýynsha mundaı aksııa ótken jyly aımaqtarda ótkizilgen. Onyń aıasynda 200-den asa júlde, onyń ishinde bas júlde – Chevrolet markasynyń avtokóligi utysqa salynyp, óz ıelerin tapqan. Azamattar aksııaǵa qatysýy úshin satyp alǵan taýar, qyzmet nemese jumys boıynsha fıskaldy túbirtekterdi memlekettik kiris organdaryna berýi kerek edi. Respýblıka boıynsha aksııaǵa 2 mln. asa adam qatysyp, 10 mln. asa túbirtek jiberdi. Aksııany ótkizý nátıjesinde zańnan tys jumys istep kelgen 9 myńnan asa jeke kásipker salyqtyq tirkeýge qoıyldy, 8 myńnan astam baqylaý kassalyq apparattar tirkelgen. «Qazaqstandyqtar ózderiniń belsendi áreketi arqyly kóleńkeli ekonomıka kóleminiń azaıýyna jáne kásipkerler arasynda adal básekelestiktiń damýyna óz úlesterin qosady» deıdi Murat Jumanbaı Bir jerde túbirtekter WhatsApp qosymshasy arqyly qabyldansa, endi bir jerde qaǵaz lotereıa bıletterine aýystyrylyp, jeńimpazdar lotereıalyq baraban arqyly anyqtaldy. «Bıyl aksııa «Atameken» Ulttyq kásipkerler palatasynyń qarjylyq qoldaýymen elektrondyq formatta kóleńkeli ekonomıkaǵa qarsy «Wipon» mobıldi qosymshasy arqyly ótkiziledi», - dep eske saldy M.Jumanbaı. Bul mobıldi qosymsha taza qazaqstandyq ónim. Ony aqysyz kóshirip alyp, smartfondardyń barlyq túrleri men basqa da gadjetterde paıdalanýǵa bolady. Aksııaǵa satyp alynǵan taýar, jumys nemese qyzmet úshin berilgen fıskaldy túbirtek fotosyn jibergen Qazaqstan Respýblıkasynyń azamattary qatysa alady. Eger fıskaldy túbirtek berilmegen jaǵdaıda, azamattar bul buzýshylyqtardy kórsetip shaǵym jibere alady. Utys jeńimpazdary túbirtekti kezdeısoq tańdaý ádisimen anyqtalatyn bolady. Jibergen chek kóp bolǵan saıyn júldeni utyp alý múmkindigi de óse túsedi. Aksııa 2016 jylǵy 1 qazan men 15 jeltoqsan aralyǵynda ótkiziledi. Osy kezeńde barlyq oblystar men Astana jáne Almaty qalalarynda aı saıyn júldeler tabystalady. Fınal jyldyń aıaǵynda Memlekettik kirister komıtetinde bolady. Onda baǵaly júldeler, onyń ishinde bas júlde – avtokólik utysqa salynady. Eskerte ketetin jaıt, qaıtalanyp jiberilgen chekter utysqa qatyspaıdy! «Jeńimpazdar ashyq túrde obektıvti anyqtalýy úshin oblys ortalyqtary men Astana jáne Almaty qalalarynda, sondaı-aq Memlekettik kirister komıtetiniń janynda quramyna kásipkerler qaýymdastyǵy, úkimettik emes uıymdar men buqaralyq aqparat quraldarynyń ókilderi kiretin komıssııalar qurylady» dedi Murat Jumanbaı. Áıgerim TOQSANBEK